16. August 2023 13:44

Lat: 41.710, Long: 20.688

Viel, viel rede, lose, dütsch, änglisch, bärndütsch u albanisch nume lose.

I bi hüt morge bi Memedis im Gäschtezimmer erwachet. I der Nacht ha n i nume d Hüng uf der Strass usse g’hört. Aber i ha ganz guet g’schlafe.

So uf die halbi achti bi n i ache u bi diräkt vom Gafur in Empfang g’no worde. Är isch früech i der Moschee g’sy u itz göh mer i ds Caffé. Das isch e Erfahrig sonderglyche.

Me muess wüsse, dass im Dorf Balin Dol e Teil nume vo de Memedis bewohnt wird. Brüedere, Schweschtere, Unggle, Grossunggle, Grosstante, der ganz Stammboum düre. Im Caffé het scho d Hälfti g’wüsst, dass i z B’suech bi. Es isch viel g’witzlet, g’sprüchlet u plagiert worde. Me het indiräkt o Kontakt zu mir g’suecht, i allne mügleche Sprache.

D Nordmazedonier schaffe in ganz Europa. D’rum probiere sy’s mit dütsch, italiänisch oder französisch.

Aber, es si nume Manne im Caffe, d Froue müesse daheim blibe.

Eigenartig, d Froue wei das o nid. D Mesibe würd im Dorf nie i ds Caffé gah, -si geit o nid mit em Gafur gah spaziere. I der Stadt, oder uswärts de scho. Es isch kompliziert.

Anschliessend wird der Gafur vo me entfernte Verwandte a g’fragt. Also göh mer vom Kafi zu däm. Dä isch aber doch nid daheim u der «Kataschter» isch o nid da. Es geit um ne Grundstückgränze, wo der Gafur söll berate. Nu de, als ‚Lohn‘ bringt der Gafur e Ladig Chochtomate vo der Frou hei.

De göh mer uf Tour. Erschti Station isch, my bi der «Work Police Station Kostivar» z mälde. Das git e rächti Fuehr. Zersch bim Pförtner, de bi der Amäldig, de i ds Büro 12 im Hingerhof. D Madame het gar nid Fröid a üs u schickt üs über d Strass i ne private Kopierlade: Pass vo mir u d ID vom Gafur kopiere u n es Formular usfülle. Das choachtet. De müesse mer zrügg zu der Madame, d Kopie u ds Formular abgäh. Das choschtet no einisch.

Überhoupt isch d Polizei hie mehrheitlech uf Gäld us. Outo mit frömde Nummero si bevorzugti Chunde für überzogeni, erfundeni Strafe, – de zeigt me sech kompromissbereit, für paar tuusig Dinar chönnt uf ne Azeig verzichtet wärde, – ds Gäld landet im Polizischtesack u ds nächschte Ässe isch so zahlt. Aber nid nume d Polizei isch korrupt hie.

Üsi Tour geit wyter i Nationalpark. Dert zeige mer Memedis der gross Stausee (wo i de letschte Jahr ungerirdisch Wasser verliert u niemer weiss wo). Der Mavorosee isch eigetli wunderschön. D Dämm si währed der Jugoslawiezyt ufg’schüttet worde, u nid übertribe höch. Es g’seht ziemli natürli us.

Aber äbe, de chöme mer zu eim vo de grössere Umwältproblem hie. Würd nume öpper de Mazedonier u Albaner erkläre, dass d Natur e grosse Wärt het u dass me der G’hüder richtig sött entsorge! Was blibt, isch Plastik u zwar i Unmängene, überall. Schad!

Im Mavrovski Merak göh mer gah käfele.

Vom See si mer de i d Hochäbeni ueche g’fahre, wo im Winter Sport betribe wird. Die Landschaft g’seht us wie n es grosses Hochmoor. Früecher isch hie i grossem Stil Schafwirtschaft betriebe worde. Das git es nümm. Es het zwar ungerwägs e chlyni Herde. Aber d Manne göh lieber in Europa gah ds Gäld gah verdiene, als hie zu Schaf z luege.

Im Dorf Galicnik (Unesco Weltkulturerbe) hört üsi Fahrt uf. Hie geit d Strass de einisch nümm wyter. Nach ere Fötelirundi fahre mer zrügg. Im nächsche Tal liegt ds Resturant Korab Trnica. Mer ässe da, aber es sig nümm was früecher.

Am Nami füehrt mi der Gafur zum Chloschter Sveti Jovan Bigorski. Riesig, dä Gebäudekomplex! I cha nume e chlyne Teil aluege, wil ganz viel g’sperrt isch. Anderdhalb Stund loufe n i desume u fötele.

Memedis si zum Resturant g’fahre, Muslime si hie nid gärn g’seh. D Moschee isch uf der angere Talsite.

Mer fahre dernah wieder zrügg zum Mavorosee u am nördleche Ufer gäge Balin Dol zue.
Uiiii, das het Idrück g’gäh!
Znacht hei mer de na de achte in Vrutok. Wenn chumi ächt i ds Bett? (23.00h zu Hause)