15. August 2023 17:07

Bibaj, A2, 1200, Nordmazedonien | 22°C

Pleiten, Pech und Pannen!

Der Afang gieng ja no guet. Ds Poschi chunnt, uf Bärn u de uf Züri chume n i o. Der stigt aber der Schnällzug us u i muess Ersatz sueche für zum Flughafe z cho. Uf em G’leis 10 wirde n i fündig. De bi n i wieder einisch a där Drähischibe vo der Schwiz. Ds Gate vor Air Serbia isch ds hingerscht u zungersch. Istigzyt sig 09.10, aber o 09.30 warte mer no.

Auso, mit nüni füfevierzg abzflüge, isch de nüt. D Abflugzyt isch verschobe. Hoffentlich wird das hüt nö öppis.

10.15 mer si scho uf der Pischte. Aber i gloube, dä Pilot wot über d Strass redle.

Zäh Minute später si mer de doch i der Luft. Itz hoffe n i nume, dass die Flugere nid o no e technische Defekt het, wie hüt Morge der Zug ds Züri.

Maria Himmelfahrt sig hüt. Öb sie ächt o so ne Lärme het g’ha i der Kabine?

Zwüschedüre düecht mi, i sig uf re Pilgerfahrt. Strängglöibegi jüdeschi Lüt mache e Grossteil im Flugzüüg us. Nu de.

Auso, itz wär i z Belgrad. Dür e Transit zum Gate z finge isch gar nid so eifach. O dä Flughafe wird um b’boue. Aber es geit, o dä Museschluuf finge n i, – zweithingerscht im Gang.

Immerhin ha n i uf em Wäg no e Bitz griechische Chueche vertrückt. 😊

Aber de brucht es wieder Geduld, bis wieder einisch – alli mit Spezialwünsch dür ds Boarding si (+45′)… bis de alli im Transferbus si (+25′) – mir tüe afe d Füess weh. 😠

U de, ungereinisch fahrt dä Hagu. ?

Zersch afe em Geböide nah, de rächts, – weiss nid wie wyt irgendwelche Flüger nah u de i me wyte Boge zu me chlyne Propällerflugerli. – Heiss u äng isch der erscht Idruck.

I ha eigetli der Gangsitz, aber e zwägpützerleti, blondi Mittsächzgere hocker scho dert, närvös macht si ihres Make-up u meint i söll der Fänschterplatz näh.Dusse rägnet’s.

Später, ob de Wulche, het es Sunne. Huiii, ha gar mid g’seh, wie nach ig em Propäller hocke.

U de chume n ig uf Skopje. Zersch lang warte zum Usstige, de dür d Sicherheitskontrolle, de gah d Goffere fische u zum Usgang. Der Gafur wartet scho u d Mesibe chunnt derzue. Das git de afe einisch e Schübu z b’richte.

 

 

Dernah fahrt üs der Gafur dür Nordmazedonie zu sim Hus. (Das isch scho no so ne idrückleche Bou, – i stune.)

I der Zwüschezyt isch es scho fasch zmitts i der Nacht. Mer si i re «Glacébeitz» i g’chert, hei ee Mesibe ihrer Verwandte troffe, si zum Znacht i der Pizzeria g’sy z hei wahnsinnig viel g’redt. Guet Nacht!