Tages – B’richt : -Dobro jutro- us Montenegro
vom: 28.9.24
in: Ulica 2 (sjever-jug), Kotor
was:
… isch passiert …
Läck het der Radovan möge Dornbüsch umhacke.
D Tour hüt faht scho e halb Stung früecher a. Zmorge git’s am halbi achti u am halbi nüni wartet ds Boot vor der Ungerkunft. Ja nu so de!
Mer böötle über ds Meer, wo ne wunderbari Näbuchappe het. Romantisch! Mer fahre bis Lepetane u der Tag erwachet geng wie meh. Da faht de o üsi Wanderig a. Mer buggle üser Ruckseck u de geit es scho steil der Hoger düruf. Schiferhüfe mache ds Loufe nid eifacher. Vo Hundegebäll begleitet verlöh mer ds Dorf.
In Gornja Lastva chöi mer ichere. Das wird e sehr interessante Ufenthalt, will der ‹Gaschtgäber› dütsch redt u viel z verzelle weiss. Das Örtli hie het nume no ei feschte Iwohner. Die meischte Hüser si läär oder am Wucheändi bewohnt. O das Hus, wo mer z Gascht si, wird so g’nutzt. Zu de Zyte, wo no g’seeröiberet isch worde, isch das hie der Houptort g’sy. Donja Lastva, wo me hüt wohnt, am Meer unger, het es no nid g’gäh.
Scho churz nach em Afang vo der Wanderig, faht ds GPS afah spinne. D Ufzeichnig vo dere Tour funktioniert nid. I muess das de daheim korrigiere. Drum isch obe nume der Afang z g’seh.
Nach em Zmittag, es git Brot, Olive, Chäs u Wasser für mi, stige mer uf bis uf d Krete, u uf der angere Site wieder ache bis zur Ortschaft Stoliv. Dä Tippu geit paarne rächt a d Subschtanz. Es isch steinig, zitewys füecht u geit rächt steil ache.
Wäjred der ganze Wanderig, vom Morge bis am Nami am halbi füfi isch der Radovan (ou) dermit beschäftiget, mit me grosse Hackmässer oder Gertu, für üs der Wäg frei z mache. Dörn, Büsch u Böim wärde unsanft am Wyterwachse g’hinderet. E rächte Chraftakt. Är macht das, für d Wanderwäge z ungerhalte.
In Stoliv wartet wieder üses Boot. Das bringt üs zu zwone Insle vor Perast. Uf der einte steit e Wallfahrtschilche, aber mer chöme z spät, für no iche z chönne. Uf der angere isch es Chloschter.
Ds Boot bingt is de a Land. Mit Spaziere u Käfele geit d Zyt düre bis zum Nachtässe. I isse hie, wie währed der ganze Wuche, wieder guet.
Wo mer zur Beiz us chöme, tröpfelet’s liecht. E Bus bringt is hei zur Ungerkunft u es rägnet. Itze, em halbi elfi gwitteret’s dusse u der Strom g’heit use.
Guet Nacht!
