Tages – B’richt : -Dobro jutro- us Montenegro
vom: 27.9.24
in: Ulica 2 (sjever-jug), Kotor
was:
… isch passiert …
Läck het das Tourischte in Kotor.
Aber, -das chunnt ersch am Schluss. Am Morge, zum Starte si mer no im Lovćen Nationalpark bim Hotäl Monte Rosa. – Es eigelig’s Hotäl. Vier Stärne, aber i de Zimmer sehr viel desolat, -schad. Dass es bim Zmorge ke Anke u o ke Margerine git, weil nicht lieferbar, stört mi itz nid so, – meh dass üsi Gruppe nid a der Sunne cha zmörgele. Aber äbe, so isch d Wält.
So um die Nüne fahre mer i Richtig Mausoleum Petar II. Der Petar gilt als Gründigsvater vo Montenegro.
Für mi isch das Mausoleum e ’sportlechi Useforderig›, meh nid. I ha Müehi mit dere Architektur u mit de Figure. Es isch wahnsinnig archaisch, monumäntal u mir isch ds Dänke derhinger chley ung’hürig.
Nu de, i blibe dusse u warte, g’niesse d Ussicht u ds Wätter.
Der Bus bringt üs de bis Žsnjev do. Ungerwäg’s bestune mer no d Us- u Übersicht über dä ganz, fjordähnlech Meeresarm, wo da mit Böge i ds Lsnd iche reckt. G’seht toll us.
Ungerhalb vo Žanjev faht der Abstieg gäge Kotor a. Das isch hüt d Houptwanderroute. Vo knapp 900m ü.M füehrt d Strecki bis zum Meer ache.
Der Wanderwäg geit i Serpentine nidsi u isch berüehmt. So um d Mittagszyt chehre mer bi me Mänu i, wo e Art vo Reschturant a der Wägstrecki i g’richtet het.
Öppe am drü si mer dunge. Mer nutze d Zyt, für dä Ort chley z erkunde, si aber nid allei. Huiiii, wuslet das a teilne Orte u i teile Gässli vo Lüt. Kotor isch sehr touristisch u glycht Stedtli wie Aigues Môrtes oder Sirmione, d Infrastruktur isch ganz uf Tourischte us g’richtet.
Am früechere Abe geit es de nach Tripkoviči, wo üsi Ungekunft diräkt am Meer steit. Es wunderbar’s Nachtässe rundet dä Tag ab.