Tages – B’richt : -Dobro jutro- us Montenegro
vom: 26.9.24
in: Heimenovani, Hotel Monte Rosa
was:
… isch passiert …
Läck, het dä See viel Buchte, Inseli u Halbinsle.
Hüt isch Abreis vo Virpazar u e Fahrt über e Skadersee.
Natürli si mer vorhär no zum Zmorge im ‹Pelikan›. No vorhär ha n i d Müggeli g’fueteret.
Nah de nüne verlade mer ds Gepäck. All Kofere i me Pärsonewage git no so es eiget’s Bild.
D Stäge dürab u mer si g’rad bi me Bootsstäg u chöi i d ‹Flora› istige. Der Kapitän vom Boot isch der Vermieter, wo n ig die letschte Tage g’wohnt ha.
Vo Virpazar fahre mer mit em Boot der Skadersee düruf. Ig ha ds Glück, diräkt im Bug chönne z hocke: es ganz eiget’s Erläbnis. Ds Wasser isch geng no chley brun u abg’schrissnig Pflanze tribe uf der Oberflächi. Meischtens begägne mer aber Seerose- u Wasserkaschtaniefälder mit verschiedene Vögel. Will der See im Durchschnitt nume siebe Meter töif isch, begägnet me dene o zmitts im See usse. Vögel si so die übleche ume, Blässhüehner, Toucherli, Änte, Kormoran u Reiher. Pelikan sött es no ha, aber mir g’seh kener.
Ds Prevlaka stige mer us. Vo itz a geit es z Fuess wyter. Meischtens geit es dür chlini Wägli obsi. Üses Ziel isch es Hus, ganz einsam, öppe i der Mitti zwüsche Prevlaka, Drušići u Karuč, höch über em See. Dä Ort g’hört aber no zum Nationalparkgebiet Skadersee.
Ds Ehepaar wo da läbt, si wytgehend Sälbschtversorger, hei weni B’suech vo usse, hei aber scho Strom u d Zuefahrtsstrass zu ihrem Hus wird itz grad b’boue.
Si hei für üs es Mittagässe vorbereitet, ohni Schnickschnack aber guet.
Nach em Mittag stige mer ab bis zum See, bis zum Dörfli Karuč. Die ganzi Zyt het es Chalchsteine u mir stige mängisch drüber, oder ds Wägli schlänglet sech zwüsche düre, je nach Grössi vo dene Brocke.
Oberhalb vo de Hüser wartet der Schofför u bringt is wyter i d Bärglandschaft iche, zu der alte Houptstadt vo Montenegro, nach Cetinje. E schöni Ortschaft. Grosszügig b’boue, mit imposante Hüser u re tolle Strasseg’staltig.
Nach me Museumsb’suech u me Stadtrundgang fahre mer wyter i Nationalpark Lovćen.
Im Parkhotel Monte Rosa si mer für die hütegi Nacht. Morn wärde mer im Park u gäge Kotor zue wandere.
Nach me feine Znacht hört e abwächsligsriiche Tag uf. Guet Nacht!