Tages – B’richt : -Dobro jutro- us Montenegro
vom: 25.9.24
in: Virpazar
was:
… isch passiert …
Läck het das möge Wasser gäh über Nacht.
Die ganzi Zyt het es g’witteret u g’rägnet. Hüt, wo n i use cho bi, für zum Zmorge, isch ds Mätteli zum Fluss füre ganz unger Wasser g’sy. E Teil vo de Usflugsboot si versoffe g’sy un es het e g’wüssi Hektik g’herrscht. Der Wasserstand vom Skadersee isch über Nacht um mindeschtens e Meter g’stige. Ds Schwemmland isch teilwys überfluetet worde. Der Radovan, üse Frömdefüehrer het zwar verzellt, dass der Wasserstand im Winter chönn um mehreri Meter stige, aber dass das so schnäll cha gah, hätt i nid g’loubt. Guet, hie in Virpazar chöme zwe Flüss zäme; – u das git Wasser wo nid ma abfliesse.
Am Morge, nach de g’wahnete Prozedere u nam Warte, bis der Räge nah laht, starte mer am Viertel vor zäni mit em Bus. Ds Ziel wär e Wanderig a der Küschte vom Skadersee. Vo Virpazar fahrt der Bus los i Richtig Albanie, aber scho churz usserhalb vom Dorf isch fertig. «D Panoramastrass isch g’sperrt wäge Ärdrütsch». Also…. nöi plane, umchehre u zrügg i ds Dorf. Es isch nüt mit em Ässe bi der albanische Familie. Ds Lädeli wird g’stürmt un es Pcknick g’chouft.
De fahrt der Buschaufför mit üs uf der alte Passstrass gäge Petrovac na Moru. Ziemli obe stige mer us u mache e Höhewanderig dür die Karschtlandschaft. Es het viel Busch-Wald, aber o offeti Flächene. Über die ganzi Bärggäged si Chalchsteine i jeder Grössi verteilt. Üse Wäg schlänglet sech da düre. Bi me tolle Ussichtspunkt ässe mer Zmittag.
Anschliessend loufe mer der Krete nah u g’niesse e tolli Ussicht. Nid uf e See, wie planet, sondern uf d Adria, uf ds Meer. – Äne wär äbe Bari.
Später het es Wald. Ungereinisch g’hört me’s glöggele u gly druf chunnt d Schutztruppe vo der Schaf- oder Geisseherde u verbrüehlet is ordeli. Es si nid eigetlech die bekannte Herdeschutzhüng. Chlineri, ehnder schüchi, häubruni Churzhaarhüngli zeige üs, wo’s düre geit. Der ‹Chef› isch e hälle, langhärige Nöifundländer, wo de irgendeinisch o no chunnt. – Si nähme ihre Job ärnscht, i wett nid probiere, zu der Herde z cho.
Ja u de chöme mer wieder zur Passstrass. Der Radovan het der Rücktransport organisiert u scho am drü si mer wieder ds Virpazar.
Macht eigetli o nüt. I loufe no über e Tourischtemärit, tue chley gänggele u choufe mer e früsch presste Orangesaft.
I der Ungerkunft tue n i de afe mal tou lüfte, es nüechtelet alles chley.
Später göh mer im Pelikan no gah Znacht ässe. Es isch nid ganz so fein, wie o scho. Aber, na ja, i ha scho schlächter g’gässe. G’mües sött me äbe nid z lang uf em Grill lah.