Tages – B’richt : -Dobro jutro- us Montenegro
vom: 24.9.24
in: Virpazar
was:
* isch chley länger g’sy.
… isch passiert …
Läck het das g’sch… rägnet letscht Nacht.
Um die sibne git es wieder Zmorge im ‹Pelikan›. Das Reschturant het e Gaschtruum, wo total mit Bilder, Hüet, Kalebasse u no vielne angerne Dekoratione zue g’hänkt isch.
Für dert häre z cho, muess i zersch guet füf Minute loufe u es rägelet gäng no.
Em nüni geit es wieder mit em Bus los – un es rägelet gäng no. Zwüschedüre rägelet’s starch. 😒 Mir b’sueche hüt zersch Bar, wo der einzig Handelshafe vo Montenegro isch, u dernah Stari Bar. Als Antibarium isch dä Ort im nünte Jahrhundert zum erschte Mal erwähnt worde (als Gägepol zur Stadt Bari in Italie). Dä Ort isch de für all Eroberer i de druf folgende Jahrhundert interressant g’sy. (Hafe u Handelsstadt, Ifallstor nach Montenegro, und und und) Entsprächend het dä Ort o g’litte. Aber ersch Chrig, Munitionsexplosione u n es Ärdbebe hei derzue g’füehrt, dass Stari Bar nümm ufb’boue worde isch (letschts Ärdbebe: 1979). Derfür isch ds nöie Bar entstande, meh i der Äbeni u necher bim Meer.
Mer fahre mit em Bus bis i d Nechi vom ‹älteschte Oliveboum vo Montenegro›. Dä Boum wird zelebriert und me zahlt sogar Itritt für ne z g’seh.😲. Was sehenswärt u b’sungersch isch: Montenegro het e eigeti, uralti Olivesorte. D Boumstämm hei Löcher (u nähmi dermit Luftfüechtigkeit uf) , d Pflanze chöme ganz guet mit der Trocheheit us u si sige sehr ertragriich.
Eh auso, mer si zersch zum Oliveboum u de vo dert afa loufe. De het es afa acheseile was het ache möge. Mini Jagge het nid lang g’ha, – der Rägehuet isch schwär worde; – es het fasch alles düreg’lah. I de Ruine vo Stari Bar isch de mit der Zyt besser worde. Mer si e Zyt lang i de Muure umeg’lüffe u sogar i ds Museum si mer.
Zmittag ässe tüe mer chley usserhalb vom alte Beriich i re tolle chlyne Beiz. Wow, alles vegetarisch u ganz wunderbar g’chochet. I ha guet g’läbt! Dusse rägnet’s nümm.
Nach em Ässe stige mer der Hoger ueche zum Hus vom Philipp, eme Olivebuur. Dä verzellt üs viel über d Böim, d Frücht u ds Öl. Nachhär ladt er die ganzi Gruppe zu sich i ds Hus i zu Kafi u Chueche. Er laht is Oliveöl lah probiere u ja, klar: er wett o chley G’schäft mache.
Nachhär wandere mer dür «Olivegärte» mit uralte Böim. G’müetlech! Irgendeinisch wartet de der Bus u ladt üs i.
Bis mir wieder in Virpazar achöme het sech der Räge ziemli zrügg.
Im Zimmer ha n i zum Glück e Ofe zum all die nasse Sache wieder z tröchne.
Znacht gah n i mit angerne i die nächschti Beiz u ha es Risotto. Der Räge zieht wieder a. 😳 Zwüschedüre brieschet’s dusse.
Es isch e ungerhaltsame, lehrriiche Tag g’sy, aber es sch…rägelet – u zwar rächt.