Tages – B’richt : -Dobro jutro- us Montenegro

---

vom: 22.9.24

in: Virpazar

was:

---

… isch passiert …

Läck bi n i hüt parat!

Spät ufstah, chlei umeplöischle u de isch scho bal Mittag. Packt isch, d Wohnig halbwäg’s ufg’rumt, Ghüder duss, abwäsche tuet d Maschine… i cha gah. Viertel vor eis chunnt ds Nachberschaftstaxi, em zäh ab eis der Zug gäge Biel, es passt.

I bi uf em Wäg nach Montenegro. Zersch mit em Zug bis Züri, de mit em Flüger nach Podgorica; – u zwüschdrinne ganz viel Zyt uf me Bänkli am warte.

D Sicherheitskontrolle geit düre, – trotzdäm, dass si es Fürzüg im Rucksack finge. De warte n i am Gate 46, i der Zwüschezyt wächsle si uf ds Gate 52.

Nu, itz bi n i im me «Embraer 190» vo der Air Montenegro u e Minute na de sächse setzt sech die Flugere i Bewegig.

Zwölf Minute später si mer i der Luft. Tschüss Schwiz!

Der Flug geit ohni Ufhebens. Mer flüge i d Nacht. Wo mer in Montenegro lande, isch fischter. Nach me super Nachtässe i re Beiz si mer em halbi elfi ds Virpazar. Mer übernachte bi Privatlüt. I ha ne Bude wie ne Turnhalle: riesig.