Tages – B’richt : -Dobro jutro- us Montenegro

---

  vom: 29.9.24

  in: Ulica 2 (sjever-jug), Kotor

  was:

 

---

  … isch passiert …

Läck isch die Wuche schnäll verby.

I der Nacht het es no ziemli lang g’witteret. Hüt morge, am halbi siebni isch scho wieder schön g’sy. Es Chrützfahrtsschiff schliicht vor der Ungerkunft düre u d Möve hei irgend e Disput.

Mir hei ersch em halbi achti Zmorge u der Bus chunnt o e Stung später.

So gäg die nüne fahre mer ab. I hätt’s guet no chley möge verlyde hie. Vo Kotor fahre mer gäg Budva u de am Meer na, gäge Sveti Stefan. In Petrovac na Moru geit es wyter i Richtig Virpazar, wo mer e chlyne Zmittag ässe. Bis zum Flughafe Podgorica isch de nümm so wyt.

Mer chöme zitig a. Ds Gepäck isch schnäll ufg’gäh. Dür d Pass- u Sicherheitskontrolle het es scho herter. Bis de aber äntlige e Flüger parat steit, geit es eeeeeeelleläng. Am vieri flüge mer äntlige los.

Der Flug sälber cha me wieder vergässe. Vo de g’sammlete Idrück us dere Wuche chah n i no ganz lang zehre. Es isch e ganz gueti Truppe g’sy, wo sech da für die Wuche g’funge het. Mit praktisch allne cha me guet uscho. Nu, – villicht g’seht me sech wieder. Sicher isch, dass i no einisch i Norde vo däm Land mit de dunkle Bärge muess.

Nach zwo ne Stung bi n i wieder ds Züri. Me gloubt’s chuum, wo die Flugere düre muess gah chehre, zum richtig ifädle, für z lande. Der Zug klappet o, itz isch no ds ‹Söischwänzliposchi› bis Rappi, aber o das fahrt sicher.

Super Sach g’sy, das Montenegro!