16. September 2023 11:03
Piazza Flaminia, 4, 25019 Sirmione BS, Italien
Gardasee, – wär wett de a Gardasee? Mer fahre hütt vom Hotäl zersch bis Sirmione.
D Erwartige si diffus bi mir. Einersits interessiert mi d G’schicht vo Sirmione scho; – ds Schloss, d Familie «Della Scala», u so. Wo mer aber i alt Teil vo däm Ort chöme, löscht’s mer ab.
Das Örtli isch total vom Tourismus überno worde. Hotäl-Reschturant-Ramschlädeli-Hotäl-Reschturant-Pizzeria-Gelateria-Hotäl-Ramschlädeli-Ramschlädeli-Hotäl-Hotäl-Juwelier-Pizzeria…
U das het Lüt da!! D Abieter vo Reisetoure hei anschinend nume das Örtli im Angebot.
Eigetli het es usserhalb e Reihe vo Parkplätz u me dörft nid iche fahre. Trotzdäm verchehre mehbesseri mit Oudi, BMW u Merz i de änge Strässli, derzue chöme d Liferante vo de Läde u Zuebringertaxi vo de Parkplätz. Es isch es typisch italiänisches «Puff» uf de Strässli. Italie müesst lehre!!
Fötele tue n i meischtens i d Höchi, drum ha n i fasch nume Türm uf de Bildli. Sirmione isch Türmliwyl vo Italie.
Mer göh i ds Kafi, dernah chley gah loufe, – aber o nid extrem wyt. D Füehrig zu de Villene vo Berüehmtheite löh merla sy.
- Maria Callas (1923–1977) lebte mit Giovanni Battista Meneghini (1896–1981) zwischen 1950 und 1959 in Sirmione
Mer trödle dür ds Stedtli, göh zum See u chehre no einisch i. Irgendeinisch isch de Zyt zum Zmittag. Car Tours heig Pizza zum Zmittag vorg’seh. D Pizzeria isch bim Carparkplatz (wie praktisch). Mer kämpfe üs dür d B’suechermasse u zytewys loufe mer mit ne. Mer si no vor der abg’machte Zyt dert u n es längt no einisch zum Öppis z trinke.
D Pizza 🍕 isch guet u gross. Mer stune, wie schnäll mer bedient wärde. Nume we me uf ds Hüsli geit, söttme ufpasse. Iche i d Kabine, Türe zue, – nach em G’schäft wieder use wölle, – d Tür laht sech nümm uftue! 😯 Zum Glück ha n i ds Sackmässer im Hosesack. Mit Chraft u chley Nachehälfe bi n i wieder befreit. 😄
Nach em Mittagässe fahre mer nach Garda. I würd säge, vom Räge i d Troufi.
In Garda het d Reiseleitere kes Sändigsbewusstsy meh. Mer chöi ganz offiziell nach eigetem Gusto handle.
Aaaalso: Mitloufe vom Car-Halteort bis zum See, es Reschturant sueche, konsumiere, fötele u dernah gah kömerle. Nach eme wytere Kafi isch de Zyt zum i Car istige.
… kenne n i doch, – vo geschter.
D Fahrt zum Hotäl verschlafe n i zu me grosse Teil. Nach em Znacht wird es de glych spät, bis i schlafe.
D Chuchi, wo die Kunschtwärch g’macht wärde.