Lago d’Iseo 2023
14. September 2023 22:59
Gotthardstrasse, 6490 Andermatt, Schweiz | 12°C
 |
 |
 |
 |
 |
 |
Rapperswil – Castenedolo, Brecia
Bis Huttwil isch ke Problem, das geit mit mim Outeli; -eifch das cheibe Ufstah … Ds Bett het mi der ganz Vormittg verfolgt.
Vo Huttu bis Luzärn geit’s mit der BLS. Mer chöme a – u n i dänke, mer loufe zum Inselipark. Aber nüt isch, mer müesse zum Carparkplatz. Dert wärde mer fründlichscht empfange. I der Zwüschezyt si mer z viert. Vo Huttu si Heinigers derby u ab Luzän a e Brienzer. Es wird g’müetli.
Mer fahre bis Brunne mit eme Chlynbus, zum Schiffsstäg. Nach längem Hin u Här chunnt de sogar der gross Bus dert häre. Zersch hätte mer sölle zrüggfahre zu me Parkplatz … das wird kompliziert!
Ersch am eis fahrt de ds Schiff. Mer chehre mal i. – D Fahrt uf em Schiff isch zwar schön, aber ernüechternd churz. Ds Flüehle wartet scho wieder der Bus. Näbeby, das isch es Ungetüm, schliessli si i der Gruppe vierzg Lüt. Nu de, so wird die Reis ziemli ‹anonym›. O das isch mal es Erläbnis wärt.
Der Gotthard muess obedüre queeret wärde, d B’richte us de Medie si no ganz früsch über dä Spalt i der Zwüschedechi.
Die Fahrt wär ganz ungerhaltsam, wäre da nid die duurende Kommentare vo der Reiseleitere, wo meint, sie müess jedi Minute mit Unnötigem fülle. Schad! Derfür isch d Natur grandios!
Gäge Abe chöme mer im Hotäl a, g’chrützlet vom Hocke: Zimmer bezieh u gah ässe. Dert chunnt de us, dass nid g’mäldet isch worde, dass ig Vegetarier bi. I bi chley enttüscht vo dene «Cartours».
Morn luege mer de wyter. – E dürzogne Tag, hüt.