18. Januar 2024 00:52

Q275+5F5, Soroa, Kuba | 21°C

🇨🇺 ¡Hola!     7. Tagesrückblick vom: 17. Jan 24

👍👍👍 Die hütige Höhepunkte

Wandere vom Bärghotäl «Castillo de las Nubes» ache zum Hostel isch spitze g’sy. E grosse Teil vom Wäg geit dür tropische Rägewald. Wunderbar!

Ort: Soroa

Reis:

Hüt faht der Tag scho bizyte a. So ab de halbe sächse isch mit schlafe nümm so viel. I mache afe chley Büro. E Grossteil vo mine Sache ha n i geschter zämeg’suecht. Wil es hüt Vormittag wyter geit nach Soroa, packe n i afe, was i cha. Dusse rägnet’s gäng no i Ströme. Gäg die achte isch ds Zmorge nache. Will der Ässegge im Hostel in Viñales i me Pavillon verusse u nid bi der Chuchi isch, muess d Chefi alles häretrage, -o bi Räge! Mit Müeh u mit mängem Gang bringt si jewile vieeeel feini Sache use, -o hüt.

Em halbi nüni wird g’mäldet, dass ds Taxi da sig. Es git g’rad wieder es Gjufel!!

Irgendeinisch si de d Zähn putzt, der Räschte packt u o ig parat für i ds Taxi.

Was itz chunnt, isch läng u ehnder längwylig. Vo Viñales ache i ds Tal geit es über Holperstrasse, de wächsle mer uf d ‹Outobahn. Bis zu üser nächschte Ungerkunft si mer rund hundert Kilometer ungerwägs.

So um e Mittag chöme mer a, müesse mal afe warte will ds Zimmer no nid g’macht isch. So um die eis ässe mer Zmittag u bruche de chley Zyt für üs. Am zwöi bringt is der Patron uf ne Hoger ueche. Dert sig e Burg. Das, was mer g’seh isch de aber es alt’s  Hotäl wo si tüe renoviere.

D Ussicht isch schön, aber süsch- na ja. Zringsetum  isch Rägewald, wo fasziniert, e richtig grüeni Höll; – aber schön! Mer loufe zersch dür alti Stäge ab. Es isch füecht u ung’hüür g’schliferig. Wyter unger loufe mer uf Steiwäge am Flüssli nah. O hie muess me gäng ufpasse süsch tischet’s eim!

Irgendeinisch si mer bim Wasserfall, em ‹Caseda de Soroa›. Da chunnt e grossi Masse vo Wasser ache. Nass isch hie alles, Pflanze, Bode u Steine, – entsprächend isch es glatt.

Leider geit der Wäg nümm wyter. Mer müesse d Flusssyte wächsle. E Brügg git es nid, mer müesse über die nasse Steine … Das g’lingt o ohni volli Schueh.

Vo itz a wird ds Wägli geng wie breiter u irgendeinisch isch’s de d Strass wo üs zur Ungerkunft füehrt.

Em halbi sächsi si mer zrügg, ässe de später no öppis u o dä Tag isch düre.

Useforderige: / Speziell’s:

Schad si mer nümm ds Viñales. Ds Hostel dert isch Spitzeklass g’sy. Itz hei mer e Abstieg g’macht.

Die gröschti Useforderig vo hüt isch aber e Pflanzeschote g’sy.
We n ig uf Reise gah, sammle ig o Pflanzesame, wo n ig daheim probiere z zieh.

Das ha ni o hütt g’macht. E schöni, haaregi Schote ha n ig päcklet ui Hosesack g’steckt. Das hätt i nid sölle, d Pflanze rächt sech.

Irgendwie hei sech die Häärli äuä g’löst, si dür e Stoff u hei uf der Hut gaaaaanz uflätig afa biisse. I ha richtig g’litte die ganzi Wanderig düre. Ig hoffe nume, dass d Häärli über Nacht us de Hose verschwinde! 😜