16. Januar 2024 20:19
Lat: 22.615, Long: -83.710
🇨🇺 ¡Hola! 6. Tagesrückblick vom: 16.Jan 24
👍👍👍 Die hütige Höhepunkte
D Taxifahrt zu de Höhline
D Indianerhöhli isch no so spannend g’sy
Ort: Viñales
Reis:
Scho im Bett g’höre n is tropfe u wo n i zersch Mal d Nase use strecke, rägelet’s.
Na me guete Zmorge, hüt morge am achti, g’seht der Tag geng no ziemli trüeb us. Es sch grau u füechtelet. Heinze isch zwar wieder einigermasse uf de Bei, aber mir beschliesse, zu de «Indianerhöhline» ds Taxi z näh. Das isch uf die zähne vo üsere «Schlummermuetter» b’stellt.
Em halbi mäldet si, dass ds Taxi da sig, – de git es churz e Juflete. Mit eme rote Plymouth isch er vorg’fahre. Es isch scho n es speziells G’füel, i däm Charre z fahre. Ds Ziel si d Indianerhöhline d Cueva del Indio. Bis dert häre isch es e Schüttelbächerfahrt. Läck het das Löcher i dere Strass. Der Räge blibt die ganzi Zyt glych.
Bi der Höhli chunnt me für ne Euro iche. Ussert üs wott das hüt niemer. Die Felswänd si scho no so idrücklech. Nach zäh Minute chöme mer zu me ungerirdische See. Irgendwo g’hört me es Motorboot. Nach ere Zyt chunnt das de verby u mer dörfe istige. D Fahrt duret nid lang, mer chöme uf der andere Bärgsite use – u es «schiffet», was ache mah. Zum Glück isch der Täxeler mit em Outo da. Mer fahre zu der Palenque de los Cimarrones-Höhli. Die isch öppe ähnlech, usser dass es no modellierti Tierfigure het. O die Höhli geit dür e ganz Bärg düre. O hie seilet’s, was ache ma.
 |
 |
 |
Vo da us geit es nach Viñales zrügg. Der Chauffeur wott is no Paladar Balcon del Valle zeige. Das kenne mer zwar scho vo der Härefahrt, aber itze.
D Sicht tuet sech uf u d Sunne chunnt für ne churze Ougeblick füre. Dertür git es anähmbari Föteli. Die letschti Station uf üser Fahrt isch d Mural de la Préhistoria. Mer fahre aber nume zum Fötele häre. (grossi Felsmalereie a re Felswand)
Nach drei Stung isch üsi Taxifahrt fertig. Mer si zmitts in Viñales i me Reschturant. Dä G’spass, relativ troche z blibe hüt Vormittag, het üs füfzäh Euro g’choschtet.
Es Täller vegetareschi Choscht u vo der Terrasse zueluege, wie es währschaft’s G’witter über ds Dorf geit, isch no churzwylig. Wo n es de chley hört, mache mer is uf e Wäg zur Ungerkunft.
Ungerwägs chöme mer no bi re Laschtwage-Busstation verby.
Der ganz Abe rägnet’s was ache ma! No im Bett g’höre n i, wie’s dusse brieschet.
Useforderige: / Speziell’s:
Der Räge isch zytewis e rächti Useforderig. Masse vo Wasser chöme ache u es wird o chüehler, es isch nume no 22°C.
