15. Januar 2024 22:06

J7CV+J9M, Viñales, Kuba | 28°C

🇨🇺 ¡Hola!     5. Tagesrückblick vom:  15. Jan 24

👍👍👍 Die hütige Höhepunkte

So absolut Überzügend isch der Tag hüt nid g’sy. Ds Beschte isch ds Zmorge im Hostel, aber o ds Znacht mit der Suppe isch speziell. Es het gsnz schöni Landschafte, Pflanze u Stimmige.

Ort: Viñales

Reis:

Hüt isch wieder Programm. Mir hei e Füehrer, wo ds Reisebüro organisiert het.

Em achti hei mer abg’macht für ds Zmorge. Das isch spitzemässig, inklusive Honigschnitteli. Normal si mer bis itze geng vo de Füehrer abg’holt worde. Hüt isch am nüni niemer da. Mer vernähme, mer müesse i ds Dorf füre loufe. Dert warti der Füehrerr. Nach üsem erschte Morgetippel träffe mer n e de o. ‹Durch das Herz des Tales› heisst die Füehrig. No im Dorf träffe mer o zwöi Dütschi, wo die Füehrig mitmache. Eigetli schad, d Madame het a allem öppis z nörgele. Ds Liecht isch nid guet zum Fötele, mer stöh am falsche Ort, mer göh der falsch Wäg, und und und… Eigetli wett si Zigarre choufe, aber vier Euro pro Stück si re z tüür. De wett si de doch wieder, – i der Zwüschezyt si nume no die Tüürere z ha. Das passt o nid. – Bi n ig froh, geit die am Abe wieder.

Mer göh no einisch dür d Höhli

D Tour füehrt ungefähr ‹der anger Wäg düre›, wie mer geschter Nami g’macht hei. Dür ds Tal zum hingere Igang vo der Höhli, de dür e Bärg bi de Flädermüüs verby, bim vordere Igang sie wieder Chlätterer, de d Stäge ache u dür ds Tal zrügg zum Dorf.

Der Füehrer (e local guide) weiss enorm viel. B’sungersch über d Pflanze wo hie wachse. Mi wurmet scho chley, dass der Hibiskus hie e Hagpflanze isch, oder wild am Waldrand wachst. I muess a miner Töpf daheim dänke, – o d Wächsu- oder Wanduröseli si hie Wlldpflanze. Bouginvillia het es i jeder Grössi u Farb em Strasserand nah.

Ungerwägs chöme mer wieder bi re Finca verby (was für ne Zuefall). Es geit um Rum, Zigarre, Kafi u Hungg. Interessant isch, vo me Farmer, eme Buur z ghöre, wie e Tabak- u Kafi-Abouer so läbt. Da o d Landwirtschaft vom Staat kontrolliert isch, blibt em Buur vo de Tabakbletter nume zäh Prozänt, wo n er darf sälber verchoufe.

Der Räschte übernimmt der Staat zu feschte , chlyne Priise. Verchouft wärde kubaneschi Zigarre zu horrände Asätz. (30 bis 120Fr. Pro Stück).
Die zäh Prozänt Tabak vom Buur dörfe nume diräkt uf em Hof verchouft wärde. (Wenn üse Buur also vier Euro het g’höische, was het de die Dütschi, wo blöffet het, das sig ds einesächzgischte  Land wo si b’suechi, no z moffle?)

D Buure si o gärn bereit z zeige, wie si der Kafi vo der Schale trenne, oder Zigarre rolle. Humorvolli Lüt, wo zwar de Tourischte müglechscht viel wei verchoufe, aber seeehr aständig si.

u si isch de sehr interessiert a de Ergäbnis

Da, i der Apothek, isch de gar nür z hole, o we me e Zerrig het.

So um die eis si mer wieder zrügg im Dorf Viñales. Mer göh gah Zmittag ässe u loufe nachhär langsam i Richtig Ungerkunft. Der Heinze het sech hüt bim Ufstieg zu der Höhli e Zerrig g’holt. Drum geit das Loufe nid so schnäll.

Es chlyses Pöiseli

Zrügg, mache mer Siesta u n ig tue Bildeli tischele. Nach ere Dusche isch dä Nami o scho wieder ume.

Ds Znacht besteit us Riis, schwarze Bohne, eme g’mischte Salat u Chips. Vorab git es e tolli Chürbissuppe u nachhär e Fruchtkompott. I läbe guet.

Useforderige: / Speziell’s:

We me i so frömde Länder isch, lehrt me allerhand Lüt kenne. Die beide Dütsche si hie u hüt nume es Bispiel. «Leben wie die Maden im Speck, trotzdem immer nörgeln und zuletzt reut einen das Trinkgeld für die, die einen bedienen.» Geit das uf?