14. Januar 2024 19:48

J7CV+J7J, Viñales, Kuba | 30°C

🇨🇺 ¡Hola!     4. Tagesrückblick vom: 14.Jan 24

👍👍👍 Die heutigen Höhepunkte

Der Usblick i ds Tal vo Viñales vom «Balcón del Valle»

D Ungerkunft in Viñales, wo Spitze isch!

D Höhli «Cueva de la Vaca»

Ort: Viñales

Reise:

Scho geschter Abe ha n i zämepackt. Hüt morge blibt nümm viel. Am achti si mer wieder bim Zmorge, halbi zähni wird g’mäldet, dass der Taxifahrer vor der Tür stöng. Zäng putze, fertig packe, abrächne; am nüni si mer parat u fahre us Havanna ab. Es geit gly uf ds Land use: Landwirtschaft isch a gseit.

Üse Täxeler het es Outo vom Staat, wo n är cha miete. Sälber eis z choufe wär viel z tüür. Siner Fahrte muess er de abrächne. Es het o Bösse, wo nach Viñales fahre. U anschinend sig o d Armee i ds Tourismusg’schäft i g’stige. O si heige Bösse wo fahre u kassiere.

Vo Havanna us si mer uf der Outobahn. Da druffe si aber o Velofahrer, – o settig wo für Renne trainiere. Zwüschedüre git es Lüt, wo stöpple oder uf ne Bös warte, oder settig wo mit em Rössliwage ungerwäg’s si. O landwirtschaftlechi Fahrzüüg trifft me a.

Ds Pinar del Rio geit es wyter uf der g’wöhnleche Strass. Das isch e ziemleche Wächsu. Der Fahrer bruucht mängisch die ganzi Strassebreiti für de Löcher us z wiche. Mer fahre i d ‹Bärge›. Viñales isch i me Hochtal, ere Hochäbeni vo Kuba. Zoberscht uf der Krete, bevor es i ds Tal ache geit, bim «Balcón del Valle», ere Tourischehaltestell, luege mer i ds Tal ache: idrücklech!

Vo dert isch nümm so wyt. Mer si im Hui in Viñales u i üser Ungerkunft «Villa el Habana».

Nach em Mittag git es afe e Siesta. Um die drü mache mer is uf ne erschti Erkundig. Mer göh quer us em Dorf use i Richtig Chalchfelse. Üses Ziel isch d «Cueva de la Vaca», e idrücklechi Höhli wo quer dür ne Hoger geit. Nach langem Wägsueche, vielne hilfsbereite Lüt, ere chlyne Chlättertour d Stäge ueche, verby bi richtige Chlätterer chöme mer zu dere Höhli. E grandiose Usblick belohnt is. I füf Minute si mer dür e Fels u luege die hingeri Talhälfti a.

Nach ere halb Stund mache mer is uf e Heiwäg. Der Troperäge isch kes grosses Problem, er g’hört fasch derzue.

Mer loufe dür ds Dorf u merke, dass hie alli vom Tourismus läbe. Es kubanisches Gstaad, aber viel ärmer.

Zum Znacht hei mer Dorade, -usnahmswys. Ds Ässe isch grandios.

Herausforderungen: / Spezielles:

Die Nacht isch ds Schlafe chley e Useforderig g’sy. Irgendwie bi n i z früech i ds Bett u irgendwie isch z warm zum Schlafe u irgendwo rattere Klimag’rät u irgendöpper het Hüehner im Huus, – u ig hät geschter no sölle Znacht ässe.