13. Januar 2024 00:38

Lat: 23.143, Long: -82.361

🇨🇺 ¡Hola!     2. Tagesrückblick vom:  12.Jan. 24

👍👍👍 Die heutigen Höhepunkte

Mir si hüt Vormittag u bis i Namittag iche vo re Kubanerin dür Havanna g’füehrt worde. D Nieves Roque Santana het zwar mal e Usbildig zur Bärgbouingenieurin g’macht, – i der DDR, drum red si so guet dütsch, – dür verschiedeni Umständ het si de aber 2006 a g’fange als Frömdefüehrere. Hervorragend si mer betröit worde!

D Stadtrundfahrt hei mer i re fürrote Cabriolimusine chönne mache. We de nid z fescht a d Umwält dänkisch, isch das e hevorragendi Fahrt g’sy.

Zrügg zum Hostel si mer de i re wilde Fahrt mit Töff-Taxis g’fahre. Zwo Froue hei üs d Stadt us ganz ere eigete Perspektive zeigt.

Ort: Old Havanna

Reise:

Hüt isch Programm. D Nieva holt üs am nüni im Hostel ab. Uf der Strass unger isch scho der Fahrer vo me wunderschöne, alte Chrisler u het üs d Outotüre uf. Mer mache e Rundfahrt dür d Stadt. Natürli het der Chauffeur e Route, wo bi de schöne Hüser verby füehrt. Der Verfall, die alte, wüeschte Hüser, d Ruine, d Boustelle g’seht me aber o. Es fählt a Gäld, bim Staat aber o bi de Private. Der Wille, die Altstadt z erhalte isch da. Ds Klima, d Nechi zum Meer u ds Alter vo de Hüser füehrt zu re fasch unlösbare Ufgab.

Natürli b’richte mer o über d Situation vo Kuba i der Gägewart. Solang die kommunistische Staate enang ungerstützt hei isch es de Kubanerinne u Kubaner guet g’gange. Hüt steit das Land ziemli allei da.

D Exilkubaner, wo i der USA läbe u zu me grosse Teil em Trump nacheloufe, tüe alles, für em Land z schade.

Si si zum Teil ganz arm dranne u läbe i Wohnige, wo Ruine si. U trotzdäm, hie läbt es läbesfrohs Volk. Uf de Strasse g’hört me in Havanna fasch a jedem Strasseegge Musig. Wo de Musig isch, wird o tanzet. B’bättlet wird o, aber nid übertribe ufdringlech. Derfür tüe alli alles für eim öppis z verchoufe, Krimskrams, Ässware, G’säng, aber o Dienschtleischtige jeder Art. D Täxeler si fasch die Schlimmschte.

Irgendeinisch hei mer is vom Chauffeur verabschidet u si de z Fuess wyter, de alte Boute nah. Die Koloniale hei vielfach tolli Innehöf. I viele vo dene Hüser si hüt Museee oder staatlechi Irichtige u o so wird Bousubstanz erhalte.

Gäg die zwöi si mer am Ässe i me wunderbare Reschturant. I berchume e tolle Salat u ne Pilzriis u am Schluss e guete Espresso.
D Nieva lade mer i. Si chönnt süsch nid so gah ässe.
So als Verglych, si verdienet im Monet um die zwöituusig Pesos. Ei Öpfu choschtet 200 Pesos. Scho no so verruckt.

Zrügg löh mer üs vo re rasante Töff-Taxi-Fahrere lah chauffiere. Toll

Es holperet, es chratzet, es quitscht, aber es fahrt.

Am Abe göh der Heinze u ig no gah loufe. Ds nächtleche Havanna isch scho no i drücklech. Viel Lüt uf der Strass, viel Ching, viel Musig, viel Liecht viel Läbe. Mer göh uf e «Leones del Prado» , e Prachtstrass, wo halb Kuba ungerwäg’s isch. Im Hostel git es no e Mojito (ohni Schnaps)u de isch dä Tag g’loffe.

Herausforderungen: / Spezielles:

Villicht isch ds Speziellschte d Fahrt im Töfftaxi g’sy. I me rasende Tämpo, ohni Gurt, ke Helm über die holperige Strasse, ja das isch Speziell!