1. Februar 2024 02:12
119 San Lazaro, La Habana, Kuba | 18°C
🇨🇺 ¡Hola! 21. Tagesrückblick vom: 31. Jan 24
👍👍👍 Die hütige Höhepunkte
- D Fahrt uf der Panoramastrass em Meer nah
- Die alte Chärre in Havanna wieder z g’seh
Ort: Havanna, Hostel Colonial San Lazaro 115
Reis:
Hüt steit wieder e Transfer a. Vo Varadero uf Havanna u itz in Kuba ds letschte Mal. (Bi der Türe stöh Tänzer.) Es chöme fasch chley wehmüetegi G’füehl uf we n i a Winter i der Schwiz dänke.
Letscht Nacht ha n i aber o in Varadero g’frore. Zmitts i der Nacht het mi düecht es heig ke Gattig. I ha im Bett chalt g’ha. Derzue muess me wüsse, dass d Bett in Kuba nume mit Lintüecher azoge wärde, u de nid öppe vo de warme, sondern eifachi, dünni. Bi der Fuessete het es meischtens es Ziertüechli, wo aber nid b’sungersch warm git.
U ds Chopfchüssi brucht me meischtens unger em Chopf, nid uf de Füess, es Dachbett kennt me nid.
D Ungerkunft in Varadero het mehreri B’sunderheite g’ha. Eini dervo si d Spält zwüsche Rhame u Tür g’sy. Bi de Fänschter si ähnlechi Zwüscherüüm ufträte. Wil i de letschte Tag ständig e chalte Luft zoge het (es isch schliessli o hie Winter 😉) ha n i ir Bude e «chalti Brise g’ha».
Das isch der Grund, dass i öppe em vieri em Morge im Schaft ha e Wuledechi g’reicht. Es het chley b’besseret aber richtig warm ha n i die ganzi Nacht nümm übercho. Notabene si de aber d Ussetämparature bi öppe 19 °C g’sy.
Nu de, em achti si mer no einisch im Frässtämpel u nähme zmorge. Em nüni checke mer us u de heisst es warte, käfele, Musig lose…
Ds Taxi chunnt em zähni. Der Fahrer isch e Luschtige, bi üs würd me lütseelig säge, er bemüeht sech.
Leider fahrt er ‹zügig› u muess o öppe telefoniere, – zu Fahre. Aber das isch hie normal. Positiv isch, dass er bi Sehenswürdigkeite öppe zum Fötele haltet. Süsch passiert uf dere Fahrt nid sehr viel.
Mer fahre uf wyter Strecki em Meer nah. Das isch d ‹Panoramastrass›. Leider g’seht me nid immer uf ds Meer. Es het Tolli Punkte mit me wunderschöne Usblick. (Leider git, oder muess der Fahrer Gas gäh) Zwüschedrinne versperrt Gebüsch d Sicht.
U um e Mittag si mer de wieder i der Houptstadt. Ds alte Bild zeigt sech. Viel kaputti Hüser, viel kaputti Lüt. U ne ständige, ufdringleche Kampf um ds Verdiene. Schad, – u doch o wieder verständlech.
Mer si im gliiche Hostel, wie em Afang. Allerdings ha n i itz es bessers Zimmer.
Uf die zwöi göh mer zäme i d Stadt. Heinze muess no Shirts ha. (Das isch de gar nid so eifach, er isch wählerisch. 😄)
Ungerwägs göh mer gah ässe u loufe de z’rügg zur Ungerkunft. Dert packe n i für morn u lah dä Abe mit ‹Büro› usplampe.(Es isch fasch zähni u uf der Strass uss isch no ei Betrieb.)
Useforderige: / Speziell’s:
Mer hei hüt drüber diskutiert, wie d Zuekunft vo Kuba chönnt wärde. Mer hei uf üser Reis fasch nume Lüt g’hört, wo mit der Regierig, mit der Verwaltig, mit der Administration unzfriede sy.
D Regierig reagiert mit Repression.
Wie lang geit das no guet? Ir Letschti chöi Lüt, wo wei gah, usreise. Aber isch das guet, fähle de die em Land nid?
Es isch z hoffe, dass das Land e friedlechi Zuekunft fingt. Es git Lüt wo säge, dass es eso wie es itz isch, nümm zwöi Jahr cha gah.
