31. Januar 2024 03:09
Km. 12 5 Las Morlas, Varadero 42200, Kuba | 17°C
🇨🇺 ¡Hola! 20. Tagesrückblick vom: 30. Jan 24
👍👍👍 Die hütige Höhepunkte
- Ds Lige am Strand
Ort: Iberostar Tanios, Varadero, Cuba
Reis:
Ig ha schlächt g’schlafe. Weiss der Geier werum. Am drü erwachet, am vieri erwachet, am füfi ufg’stange – u zweni g’schlafe. I ha de am Bitrag vo geschter umedökterlet u ne freig’schalte, de nomal probiert z schlafe, de Chleider ussortiert für hie z lah. Nach längem isch de Zyt für Zmorge g’sy.
Nach em Zmorge ha n i d Vorhäng zoge u bi uf ds Bett. O Wunger, ersch am halbi zwölfi erwache n i wieder. Ja u de isch scho fasch wieder Zyt für e Zmittag.
Nach em Ässe bi n i a ds Meer. Schwümme cha me geng no nid. I parke mi uf me Liegestuehl u luege lang däm Meer zue. Zwüschedüre schlafe n i no es Ründeli u später loufe n i em Wasser nah.
Am vieri triffe mi mit Heinze u mer probiere, ere Kubanerfamilie in Playa Larga es Pack mit Chleider z schicke. Alli wo mer frage, säge dass es Pack mit der Poscht nie achömi. Usserdäm wär da Verschicke viel tüürer, als der Wärt vo däm wo dinne isch. Scho verruckt, was macht die kubaneschi Poscht, es git se ja?
E Ladeinhabere vo Varadero het schliessli d Idee, e Bekannte us Playa Larga chöm nächschtens verby, dä würd de das Pack dere Frou bringe.
That’s Cuba!
Für em halbi siebni hei mer es Speziell’s Ässe b’buechet. Vegetarisch. Scho als erscht’s Häppli chunnt es Bletterteigstückli mit Schinke drinn. I bi mir das ja g’wanet, der Heinze wott ds Trinkgäld striiche. 😉
Nach ere Piña Colada bi n i de öppe am zähni am Packe.
Morn geit es zrügg nach Havanna.
Useforderige: / Speziell’s:
I grage mi, öb d Schwizerinne u Schwizer die Poscht verdienet hei, wo si hei. Das G’jammer über die höche Priise, oder we d Posch nid genau denn chunnt, we si sött, ider e Tag verspätet i trifft…
Mi tüecht no verruckt, we ds Volk der eigete, staatleche Poscht so gar nid vertrout. Mer hei niemer troffe, wo sech für se i g’setzt hätt.
Was macht de Poscht hie, we niemer öppis verschickt, sondern lieber sälber, oder dür Bekannti bringt.
