28. Januar 2024 17:31
Iberostar Tanios, Varadero, Cuba
🇨🇺 ¡Hola! 18. Tagesrückblick vom: 28. Jan 24
👍👍👍 Die hütige Höhepunkte
Der karibisch Strand usserhalb vom Hotäl
Ort: Iberostar Tanios, Varadero, Cuba
Reis:
Mer si richtig «Zügumanne». Hüt geit es nach Varadero, a ds Meer.
Gägenüber isch Chatzechrieg
Sächsi drissg, der geschterig B’richt no einisch düreläse u veröffentleche. De ds Morgetoiletteritual, fertig packe u später Zmorge ässe. Es isch wieder ganz fein, d Froue hei sech Müehi gäh.
Abrächne müesse mer no u nah de nüne chunnt ds Taxi.
D Fahrt vo Santa Clara bis Varadero isch nüt b’sundersch. Über e wyte Teil geit es uf der Outobahn. Das isch aber nid z verglyche mit ere Outobahn i der Schwiz. Es si zwo trennti Fahrbahne mit öppe je drei Fahrspure. Der Belag isch, vo usse gäge inne, geng chley weniger löcherig. Uf der üsserschte Fahrspur si Rosswägeli, d Traktore u die langsame Motorfahrzüg. Uf der mittlere si de die öppis Schnällere, uf der innerschte si die Pressierte ungerwägs.
Üse Chauffeur isch meischtens uf der innerschte Spur, we nid g’rad Löcher si. Me merkt, es pressiert ihm; – er muess no zrügg uf Santa Clara.
Öppe am eis si mer ds Varadero: u si g’rad chley g’schocket, ömu ii. Der touristisch Teil vo däm Ort besteit us seeeehr grosse Hotälalage. Grösser, als ig je erläbt ha.
A der Reception luege si läng, u wei üs i nes angersch Hotäl tue, will hie (überbuechet) ke Platz sig. Im Beschrieb zu üser Reis het es g’heisse, mer sige i me Bungalow. (Im Iberostar, wo mir logiere, si die Bungalows gross u biete Platz für je acht bis zwölf Parteie. Die idylleschi Vorstellig vom Bungalow am Strand isch afe mal i d Hose. Aber das wüsse mer ja no nid ) Mer beharre, wäg der romantische Vorstellig, uf em chlyne Hüsli, u wärde äbe später de ‹eines Besseren belehrt›.
Nu guet,irgendeinisch quartiere si öpper andersch us, u mir wärde als Hotälgescht akzeptiert. Jede überchunnt es blaus Bändeli um ds Handg’länk (das isch der Freipass für die meischte Angebot im Hotäl.) De göh mer i n es Näbegeböide, eme Art Frässtämpel. Grossi Büffee, mit allne mügleche Spyse, chalt, warm, süess, suur, fleischig, vegetarisch, – alles isch da im Angebot u wird duurend ufg’füllt.
I bi wieder g’schocket. – In Havanna het es Lüt, wo Hunger hei.
Mer ässe, beobachte Lüt, schnöde chlei; – um die vieri dörfe mer de i d Zimmer u bestune die Ungerkunft. Ja nu so de, sig’s eso.
Mer richte n is i u strecke für ne Zyt d Füess.
Später luege mer is d Umgäbig a u loufe zum Strand übere. Dä isch idrücklech schön.
Uf em Rückwäg dunklet’s i. Mer trinke es Kafi u göh de zrügg zu de Zimmer.
Später b’sueche mer no einisch der ‹Frässtämpu› u n ig nime Salatigs, Fruchtigs, Süesses. Zu karibische Kläng mache n i Büro.
Der Abschluss vo hüt isch e B’suech i re Sitebeiz. Heinze brucht e Drink u ig nime Kokossaft.
Useforderige: / Speziell’s:
Natürli isch es nid eifach, es Hotäl z betribe. D Uslaschtig isch der Massstab, öb’s räntiert. Öb aber überbuechig d Lösig isch wage n ig z bezwifle.
We me i checket, g’seht me nid, wie d Zimmer si. Villicht hätte mer mit em Hotältuusch ‹der Besser g’macht… 🤔
