28. Januar 2024 03:30
Lat: 22.404, Long: -79.964
🇨🇺 ¡Hola! 17. Tagesrückblick vom: 27. Jan 24
👍👍👍 Die hütige Höhepunkte
B’suech bi re kubanische Burefrou
Ort: Suite Florencia, Santa Clara
Reis:
Hüt Morge bi n i scho am sächsi erwachet, aber ersch am halbi siebni ufg’stange. Scho vor em Zmorge föh d Ching mit unwahrschiinlech lute Umzüg a lärme. Morn isch der Geburtstag (1853) vom Jose Marti, eme Poet, Schriftsteller u em Nationalheld vo Kuba. Zu Ehre vo däm loufe d Ching mit «Pauken und Trompeten» dür d Strasse vo Santa Clara, brüele Slogans u skandiere Värse. Begleitet wird das Spektakel vo Trummle u Pfiffe u vielne Lehrerinne u Lehrer, wo luege, dass d Ching nid z fescht dumm tüe. Jaja, so isch das hie.
Mer hei wieder kubaneschi Frücht uf em Tisch u ässe dies Mal i me Wintergarte. D Ching g’hört me, als würde si näbe eim stah.
Der letscht Marti-Verehrer, oder het er meh Fröid am Pfifouter?
Ungerwägs chöme mer bim Märit verby
Nah de nüne mache mer is uf e Wäg zum Che – Museeum. Das si kener zwe Kilometer u mer göh z Fuess. Santa Clara het e spezielli Beziehig zum Che Guevara. Es het Monumänt, Museee es Mausoleum.
Heldeverehrig i jeder Form het mer gäng Müehi g’macht, – o hie isch das so. (Soldategräber wärde immer vo de Sieger missbrucht.) Sig das i der «guete, alte Schwizerg’schicht», in Vietnam, oder hie in Kuba.
Dass mer i däm, wo mir als Museeum hei a g’luegt, nid dörfe fötele, ja guet. I beschliesse dusse z blibe u zu de Fotosache z luege. Uf der Zuegangsstäge wär zwar Schatte, aber dert darf me nid hocke. Also gah n i zu re vordere Stäge, zwänzg Meter ewäg u hocke zu me Böimli. Wo de e Frou da uf ds Müürli hocket, bäfzgeret es Soldätli scho wieder, das sig verbote u ig dörf de vo da, wo n i sig, o kener Föteli mache … I ha chley Müehi! Später vernime n i, dass das hie ds Mausoleum sig. – Ja aber o denn! Nu guet, d Glatze poliere u wytermache.
Uf e Mittag loufe mer wieder i Richtig Stadt.Ziel isch, öppis z ässe. Das Resturant, wo ne gattlige Idruck macht, isch total überfüllt. I re Pizzeria, füfzg Meter wyter het es Platz. Es git ke Trinkwasser u het es Tischli mit me Tischtuech, wo de g,sehsch, was letscht Monet drann g’gässe worde isch. Mer b’stelle Pizza. Es chöme zwo mit me Durchmässer vo weni meh als zwölf Centimeter. Na ja, mer wei ja abnäh. 🤪
Am eis hei mer mit em Täxeler vo (vom Vater) geschter abg’macht. Im Louf vom Vormittag chunnt us, dass är nid sälber chunnt. Är schickt e Angestellte, wo nid änglisch u o ke angeri Sprach als Spanisch cha.
Mer wette vo Santa Clara uf ds Land use fahre, schöni Landhüser fötele u chley öppis vo däm Landläbe erfahre. Aber, : üse Taxifahrer kennt ds Land nid, wie n er seit. (Er grüesst zwar all pot Lüt, geit nid ganz uf.)
Wöschtag
Ja also, mer fahre u i probiere hinger drinn Fotos z mache. Zwüsche düre haltet er a. Näb der Strass het es e Bahnlinie. Öb die ächt no i Betrieb isch. Mer erfahre weni. Im Louf vom Nami erreiche mer Placetas.
,Zuckerrohrärnt›
der ‹Dröscher› isch leider kaputt
Paar Kilometer wyter chöme mer zu me Zuckerrohrfäld wo si vo Hang abärnte. D Maschine isch kaputt. Der Stras nah chöme mer zu me Tabakpuur.
Bim Tabakbuur
Bletter tröchne
Dä nimmt sech Zyt u zeigt der Betrieb. Kenne n i scho. Es isch stickig u düschter i der Tröchnigshalle.
Uf em Rückwäg chöme mer zu re ältere Büüri, wo Yuca oder Maniokwurzle ärntet. Bi ihre si mer ziemli lang u trinke no Kafi. Das macht Idruck u isch sehr symphatisch!
 |
 |
 |
 |
Der Eifachheit halber b’stelle mer i der Unterlunft Znacht. Es git es Drühgangmenü wo d Portione munzig sii. Heinze muess no Brot verdrücke.
Useforderige: / Speziell’s:
Es isch geng wieder es Problem, was d Lüt nach em Tod vo re Pärson drus mache. Bi berüehmte Lüt wird mängisch e Pärsonekult betriebe, wo nümm schön isch.
Kommunisteschi Staate si Meischter i däm u nütze der Status vom Tote o us. Warum muess das so sy??
