26. Januar 2024 15:22
C23P+Q3X, Maestra Nicolasa, Santa Clara, Kuba | 21°C
9🇨🇺 ¡Hola! 16. Tagesrückblick vom: 26. Jan 24
👍👍👍 Die hütige Höhepunkte
(me wird aspruchsvoll 😉)
Ort: Suite Florencia, Santa Clara
Reis:
Hüt reise mer wieder wyter. Der Abschied in Trinidad fallt nid ganz eifach. Zmorge git’s wie üblech, – em halbi zäni chunnt ds Taxi. Der Chauffeur jung, weni interessiert, macht der Idruck, wie wen er lieber Popsänger wär worde. Telefoniert viel u fahrt wie ne Räuber. Zwüschedüre louft e Art Rap i eire Lutsterchhi, – är singt mit. Churzum: Mer würde ne ustusche, we mer chönnti.
Am Mittag sinmer düreg’sschüttlet, mit flauem G’füehl im Mage, in Santa Clara. De heisst es wieder einisch d Koffere i erscht Stock ueche buggle.
Nach ere Stund Erholig göh mer i d Stadt. Santa Clara isch nid so touristisch. Es het zwar sicher o viel Casa particular u Resturant, aber weniger Tourischte-Ramsch-Lädeli. Es Hüngerli bringt is derzue izchehre. Mer lande im Colón 64, e staatlechi Beiz, mit weni Charm u re Ambiance vo re Mensa. Es isch e Erfahrig, wo eim d schwizer Reschturant laht lah schetze. D Süesshärdöpfu si chalt,der Riis lauwarm u der grüen Salat so, dass i dä lah la stah.
Mer loufe dür d Stadt i Richtig Bahnhof.Teilwys si d Boute seehr boufällig, schad. Ungerwägs göh mer e Gedänkstätt für e Che Guevara aluege. «Mit eme Trax heig är hie e Zug vom Batista-Regim zum Entgleise bracht». D Zyt vergeit
Im Bahnhof fahrt eine vo de sältene Züg, i Richtig Havanna ab. Der Mangel a Diesel würkt sech o hie us. Mer mache paar Föteli u träte der Rückwäg a. Der G’luscht nach Kafi tribt is de i nes wytersch Reschturant. Später isse n i no e vegetarische Taco.
I der Zwüschezyt isch es dämmerig. Uf em Santa Clara Platz redt üs e alte Mänu a u empfiehlt üs si Suun, wo Taxifahrer isch. Mer wärde g’seh, wie n er sech macht, mer engagiere ne für morn.
Churz nachdäm mer zrügg im Casa Particular si, stellt d Stromversorgig ab.
Der Strom vom Laptop ha n i b’brucht, d Akkle vo de Fotoapparät si o läär u itz bruche n i der Strom im Handy.
Zwo Stund später isch geng no alles dunku. (Zwänzg vor zähni isch der Strom wieder da, na meh als vier Stung).
Useforderige: / Speziell’s:
Ig füehle mi a d Lotharzyt erinneret. Der ganz Abe fählt der Strom i der Strass u im Quartier. Das regt anschynend niemer uf, – am wenigschte die wo das sötte flicke. Me wartet eifach ab, gottergäbe.
Ig hoffe nume, das Brichtli irgend einisch fertig z ha.
21.42h der Strom isch wieder da! 🥹