24. Januar 2024 13:15

265 C. Santo Domingo, Trinidad 62600, Kuba | 24°C

🇨🇺 ¡Hola!     14. Tagesrückblick vom: 24.Jan 24

👍👍👍 Die hütige Höhepunkte

D Wanderig dür e Bärgwald isch toll g’sy

Ort: Casa Zenia, Trinidad

Reis:

Der hütig Tag het bewölkt a g’fange. Uf die achte, wo mer Zmorge g’no hei, isch scho total grau g’sy. Mir hei ds Ässe g’nosse u n is uf d Jeeptour g’freut.

Am nüni isch dwr Tourguide samt Fahrer vorg’fahre, i me Honda. Nüt isch mit Jeep. Mer fahre i d Bärge hinger Trinidad. Im Schwick si meruf 500m über Meer. (Trinidad liegt uf rund 45m).

Erschti Station isch ds Informationszäntrum vom Nationalpark. Dert erfahre mer, dass es mehreri regionali Zäntre git. Ei setige ‹Unterpark› wärde mer b’sueche. Im Louf vo däm Stationsb’suech erfahre mer o, dass die b’buechti Tour so nid cha düreg’füehrt wärde (der Jeep isch defekt u der Honda cha nid jedi Strass fahre, drum loufe mer e Strecki (u de die glychi wieder zrügg), ds Resturant muess o no g’wächslet wärde. Ja de halt .. aber es isch schad. Es rägelet.

Die nächschti Station isch ds ‹Kaffeehuus›. Der zeigt is der Füehrer, mit welne Hilfsmittel früecher Kaffee aboue u g’wunne worde isch. I ha das eigetli scho alles kennt u ds Beschte isch der offeriert Kafi g’sy.

De si mer los g’loffe. Mi erstunt, wieviel Kaffeeböim da i däm Parkwald a g’setzt worde si. O der Nationalpark wird also für e Abou g’nutzt. Zwüsche de Kafiböimli get es Banestude. Die Pflanze ergänze enand.

I de Böim u im G’strüpp het es verschiedenschti Vögeli. Eine isch wieder der Nationalvogel, der Kubatrogon (rot-wyss), es het aber o Kolibri hie. Der Wäg isch pflaschteret mit Pflanze. Vieli kenne n i wieder vo daheim us em Garte. Ds Wätter wird geng wie besser.

Ungerwägs het der Heinz wieder Problem mit sim Bei. Der Hiwäg geit meischtens nidsi. Mer chöme bi me wunderschöne Wasserfall verby, em Fluss nah geit es zu verschiedene Teichli u Seee. Wieder zrügg zum Outo isch müehsamer, – es geit obsi u belaschtet d Beimuskle.

Uf em Wäg zrügg nach Trinidad chehre mer i me Resturant i. Salat, G’mües, e Art Maniok, Omlett u Bohneriis; – jammere cha ni nid als Vegetarier. Obschon, – soviel Eier wie hie ha n i die letschte füf Jahr nid g’gässe. 😏 Aber, was söll’s.

Zrügg in Trinidad, im Casa, isch e Therapeut ume. Dä nimmt sech däm lädierte Bütlerbei a u es schiint z würke. Heinze het g’rüehmt u ligt itze. I lige im Hof uf me tolle Sofa, es geit es laus Lüftli un es isch 26°C. Nümm vo Räge.

Useforderige: / Speziell’s:

Die einzelne Kubanerinne u Kubaner si unkompliziert u hilfsbereit. Dä alt Mänu het em Heinze problemlos u sofort g’hulfe.

Kompliziert wird es, we e Organisation sött reagiere. We der Jeep kaputt isch, de cha me d Tour eifach nid mache … obschon angeri chönnte ushälfe. Me chönnt ja, nach Absprach, bi anderne mitfahre. Flexibilität würd Kundefrübdlechkeit bringe. Die bruche die staatleche Organisatione äuä nid.