22. Januar 2024 14:52
(21.79, -79.98)
🇨🇺 ¡Hola! 12. Tagesrückblick vom: 22. Jan 24
👍👍👍 Die hütige Höhepunkte
D Unterkunft in Trinidad isch super
Mer hei ganz guet g’gässe i der Stadt
D Architektur, d Hüser in Trinidad isch spitze
Ort: Casa Zenia, Trinidad
Reis:
Ig starte hüt scho so um die sächse. Na der übleche Morgerenovation muess i afe einisch zum Meer füre: friedlech, d Sunne geit uf. Na paar Föteli gah n i zrügg ga packe, mer reise hüt nach Trinidad (tönt guet, oder). Am Viertel nach siebni chunnt d Bedienig vom Dachresturant cho säge, mer chönnt e cho Zmorge ässe. Irgendwie röit mi scho, hie wäg, – mer g’höre scho fasch chlei zum Betrieb.
Em halbi zähni sött ds Taxi cho, aber da isch niemer vor em Hus. Es chunnt us, dass das vor der falsche Casa particular g’halte het. E halb Stund speter u etleche Telefon, fahrt er bi üs vor. Ohni viel z überlege stige mer hinger i u merke ersch z spät, dass d Schibe so verdunklet si, dass me nid use g’seht.
Der Täxeler het’s pressant. I eim Chut freset er vo Playa Larga bi Trinidad. Vo der Landschaft hei mer weni bis nüt g’seh, schad.
Mer chöme nach em Mittag hie a. Nid uf der Insle Trinidad, sondern i der Stadt Trinidad uf Kuba.
Nach der Akunft im Casa Zenia, wo wunderschön u friedlech isch, müesse mer is afe einisch b’chiime. Dernah spaziere mer dür d Stadt. Wunderbar schön. Mir g’fallt es uf Ahieb.
Är isch e Veteran u verzellt gärn vo früecher…
Es is h e läbegi, farbegi Stadt mit eme ganz alte Chärn. Uf der Strass si ganz viel Lüt ungerwägs.
Uf em Wäg i d Altstadt ässe mer i me chlyne Beizli. D B’sitzere macht uf der Strass Reklame u überzügt. Ds Ässe isch aber o guet!
Obe uf em Hügu isch d Chilche. Woby, – das isch nume no e Ruine. (Es intakt’s Gotteshus für Katholike u die Evangelische isch wyter unger). O uf em Hügu si die ärmere Gägende.
So uf die füfe mache mer is wieder uf e Wäg zum Casa.
Mit Bilder tischele u Tägscht schribe klingt dä Abe us.
Useforderige: / Speziell’s:
Warum mache Tourischte das Spieli mit, Ching Gäld z gäh? In Trinidad het es weiss Gott armi Lüt, aber Ching zum ‹Gäld höische› z erzieh isch der falsch Wäg. So hilft me nid!
Mer luege däm Spieli zue, wie Buebe Tourischtinne für Gäld a b’bättle. Die gäh ne, woruf die Jungs im nächschte Lädeli Schläckzüüg choufe. Drüü-, Vierjähregi wärde i däm Rummel zu Fotomodäll, Müettere ‹verchoufe› se. Was isch das für ne Wält?
