21. Januar 2024 22:24

Lat: 22.280, Long: -81.214

🇨🇺 ¡Hola!     11. Tagesrückblick vom: 21. Jan 24

👍👍👍 Die hütige Höhepunkte

I ha hüt lang u guet g’schlafe 🥱

D Kolibri 🐦 hei mer ganz guet g’falle

Ds Dessäär us Kokosraschple, Kokosmilch u Vanillezucker isch e Wucht g’sy!

Ort: Casa Enrique, Playa Larga

Reis:

Mer hei geschter beschlosse, dass der hütig Tag rüehiger müess sy. Einersits isch Sunntig, anderersits hei mer ja eigetli Ferie u de si mer alti Manne, und und und

Ufstah tüe mer spät. Zmorge isch em halbi nüni – u mer müesse lang Pancakes, Brötli, Frücht u Kafi g’niesse.

Der Täxeler mit em Chevi chunnt em halbi zwölfi. Bis denn brösmele mer ume, – irgendwie vergeit d Zyt im Flug.

Uf em Härewäg hei mer scho g’seh, dass in Guama e Krokodilfarm isch. Mer hei geschter beschlosse, die mal gah z b’sueche. Usserdäm gäb’s in Palpite e Ma, wo Kolibris heig. Muess me o g’seh ha.

Uf die zwölfe chöme mer mit em ‹Schüttelbächer› – Taxi in Guama a. Mit Glück! Der Chauffeur het am Morge si Diseltank g’füllt u irgendwie isch Wasser drin g’sy. Es rucklet u stotteret, zwüschedüre stirbt der Motor ab, – aber mir chöme bi de Krokodil a. Währet mer d’d Tier luege, putzt der Chauffeur der Diselfilter.

Itritt müesse mer o zahle. 1200 kubaneschi Peso, das si öppe 4€40Ct. Der CUP het weni Wärt.

Die Farm besteit us mehrere Teile. Zersch fallt uf, dass es riesigs Geböide im Bou wär, aber no nid fertig isch. D Mehrheit vo de Hüsli si Lädeli, mit viieel Krimskrams u Reschturant, wo es grosses Spirituoseangebot hei.

Ja, u de het es i dreine Bereiche o Krokodil. I zwöine G’heg het es ganz jungi, wo aber scho veiechli chönnte biisse. I me ganz grosse Beriich mit ere Muur drum u me See drinn, si die Usg’wachsne. Da derhinger het es no zwöi Becki mit Halbwüchsige.

I Beurteilige wird die Krokodilfarm als verglichswys guet i g’stueft. I cha das nid so beurteile, aber mi tüecht o, dass es d Tier rächt guet hei. Mi tüecht aber o, i dene G’heg si z viel Tier. Vieli hei o verbissni Körper. Was da ’normal› isch, cha n i nid säge.

Irgendeinisch hei mer ’s de g’seh. Zudäm het der Heinz e blöde Tritt g’macht u si Musku wieder zerrt.

Der nächscht Bsuech füehrt is z’rügg uf Palpite zu däm Kolibrimaa.

Am Rand vom Dörfli, hinger eme Eifamiliehus im Garte steit e blüehende Struch. Drin het der alt Päpu no Zuckerwasser-Fuetergleser ufg’hänkt. Es schwirrt, brummlet, sürelet, chäderet, pfift u zwitscheret u munzegi Vögeli pfile desume. Mir isch nid ganz klar, warum das so funktioniert, wie’s das tuet. Die Vögeli flüge komplet frei desume (derzwüsche chöme no anderi Vogelarte sech cho verpflege). Me chönnt ne stundelang zueluege, wie si Zuckerwasser süggele u dernah wieder der Schnabu i Blueme stecke. Werum die Schar über Nacht nid verschwindet isch für mi es Wunder.

Zmittag nähme mer nach em Zrüggcho wieder im Casa Enrique. Der räschtlech Nami si mer em umenüschele, zämepacke, schuehputze u wäsche.

Am Abe chunnt de no e grossi Reisegruppe a, wo ds Huus wieder mal füllt. D Chefi isch froh. Sie het es grosses Huus u o ne grossi Truppe z ernähre. Aber, es isch es grosses «Amerikaner Gebuffe».

Useforderige: / Speziell’s:

Spezialisierig isch guet u rächt. I Teile vo Kuba setzt me sider langer Zyt uf Tourismus. D Pandemie het es grosses Loch i die Inahmequelle g’risse. Mi düecht me sött nid zu sehr uf ei Inahmequelle setze. D G’fahr, plötzli uf em Trochene z hocke isch gross.