20. Januar 2024 12:04

Lat: 22.280, Long: -81.214

🇨🇺 ¡Hola!     10. Tagesrückblick vom: 20.Jan 24

👍👍👍 Die hütige Höhepunkte

Der Usflug i ds Delta zu de Flamindo het mer sehr guet g’falle.

Ds Museeum isch o guet g’sy, we me d Propaganda chley tuet usesttyche.

Ort: Casa Enrique, Playa Larga

Reis:

Der hütig Tag faht chley früecher a. Mer wey i ds «Zapata-Reservat». Das isch es riesig’s Sumpfgebiet, grad näbe Playa Larga.

Morgenässe am siebni, Start em achti vor em Casa mit em Täxeler u me Führer us em Naturschutzgebiet Parque Nacional Ciénaga de Zapata. Mit me alte Chevi fahre mer los u si gly druf uf re Holperpiste ungerwäg’s. Ziel isch, chley öppis über d Tierwält vo däm Park z erfahre. D Vögel si Früehufsteher, drum müesse mer o bezyte use.

Das ufg’schüttete Strässli füehrt schnuergrad dür d Landschaft. Rächt’s u link’s dervo stöh Mangrove. Drü verschideni Boumarte zellt me hie derzue. Unterscheide cha me se nume a de Bletter.

Vo obe verzweige d Würze wit obe vom Stamm wäg u unger chöme die de wieder der Bode düruf. (Luftwurzle) All das, wäg däm cheibe Salzwasser.

Flamimgo g’seh mer ziemli gly. Da dermit hei si die Tour o beworbe. Es wär aber vermässe, z gloube es heig Masse dervo. Mer g’seh einzelni oder Grüppeli vo Tier uf üser Tour. Chley später si de o anderi Vögel ungerwägs u mache de Fische ds Läbe suur.

Termite het es massehaft

Uf e Mittag si mer de wieder im Casa u berchöme es fein’s Ässe.

Am eis fahrt de der Ephrahim mit sim Taxi bis Giron. Dert isch es Museeum vo der Schweinebuchtinvasion.
Es isch es ung’hüür schwierigs Thema, wo da behandlet wird. Klar, d Sicht vo der kommunistische Partei wird zeigt, d USA wird als Agressor darg’stellt u chunnt ganz schlächt ewäg.
I der USA g’säch me sech lieber als die, wo de Vertribene, de Exilkubaner hei wölle hälfe gäge d Revolutionäre.

Dass der USA-hofiert Despot Batista längschtens überfällig isch g’si u d Revolution in Kuba für d Kubaner e Säge bedütet het, isch i der westleche Wält nume sehr zögerlech zur Kenntnis g’noh, geschweige de g’würdiget worde.

Chley liechteri Choscht isch de d Cueva de los Peces.

Cueva de los Peces: eine 70 m tiefen Cenote (Dolinenloch) im Landesinneren der Küstenstraße auf halber Strecke zwischen Playa Larga und Playa Girón.

Mer göh gah bade. Schad tuet mer dür ds Schwümme der Rügge bal so weh, dass i schlapp mache.

Am spetere Nami si mer wieder im Casa.

Useforderige: / Speziell’s:

Werum chöi Erfahrige, wo Mönsche mache, nid wyterg’gäh wärde, – gratis u verbindlech? We me dänkt, wie lang i der Schwiz G’hüder i de Gräbe entsorgt worde isch u was me g’wunne het, sider dass das nümm passiert, wär doch naheliegend, dass die Erkenntnis a d Kubaner wyterg’gäh würd, – oder?