19. Januar 2024 16:13

7QJP+5F9, Playa Larga, Kuba

🇨🇺 ¡Hola!     9. Tagesrückblick vom: 19. Jan 24

👍👍👍 Die hütige Höhepunkte

Vom Hostel us füehrt e churze, diräkte Wäg zum Meer.

Ort: Casa Enrique, Playa Larga

Reis:

Üsi Reis geit wyter. Nach ere guete Nacht erwache ig em halbi siebni. D Güggle tüe wie wild, i cha nümm schlafe. Also stah n i uf u packe. Nachhär gah n i use gah fötele. Hinger der Muur vom Awäse g’seht es de nid so guet u fotogen us. Es het zwar es Flüssli aber das isch es Dräckloch. Der Ghüder wird diräkt da dri entsorgt: sehr schad.

Uf die achte git es Zmorge. I ha zwöi Toast Sandwitch mit Tomate u so. Ha chlei es Drück im Buch. Der Kafi isch guet.

Am nüni steit der Fahrer im Hof, für üs in d Schweinebucht z bringe.

D Fahrt geit mehrheitlech über Outostrasse u es isch e längi Fahrt. Vo der Landschaft g’seh n ig weni. Zytewys het es Fälder, mängisch düecht mi o es sig wie Steppe, oder Tundra, oder so. Gäge ds Meer zue git es Zuckerrohrgebiet.

Am Mittag si mer in Playa Larga. Dä Ort isch am innerschte Zipfel vo der Schweinebucht u sehr touristisch. Nu de, mer si ja o Tourischte.

 

 

Em halbi zwöi ässe mer Zmittag u si erfröit, wie guet das isch. Zum Verdoue mache mer de e Spaziergang i ds Dorf. Ja, in Playa Larga isch nüt wahnsinnig spannend. Es git gaaanz viel Ungerkünft, viel Verpflegigsbudeli, meh oder weniger g’glückti Getränkeständ, – aber süsch …

Gäg die halbi sächsi göh mer zrügg i ds Casa. Zum Znacht näh mer de nume no es Ig’chlemmt’s.

Zu kubanische Rhytme bröselet dä Abe us.

 

Useforderige: / Speziell’s:

D Internetabindig isch geng wie schwieriger. In Soroa het me gar ke Wireless g’ha u hie in Playa het es zwar, aber es funktioniert gar nid.

I muess probiere, alles über ds Handy z mache.