18. Januar 2024 22:42

Q275+5F5, Soroa, Kuba | 27°C

 

🇨🇺 ¡Hola!     8. Tagesrückblick vom: 18.Jan 24

👍👍👍 Die hütige Höhepunkte

Spitze, dass miner Wanderhose nümm bisse. 😅

D Rägewaldwanderig het mer ganz guet g’falle.

Ort: Q275+5F5, Soroa, Kuba

Reis:

Der hütig Tag faht guet a. Obschon ig i re rächt eigenartige Bude übernachte, ha n i ganz guet g’schlafe. Mi Wecker geit am halbi siebni, i mir Bude isch no dunkel. Bim Bett het es ke Schalter, drum bruche n i e Taschelampe (eifach will i nid so weiss, was da em Bode umehuschet. Düschele, Chleider füresueche, dräckig Chleider zum Wäsche bringe, Fotoapparat parat mache, – em achti isch Zyt zum Zmorge. Das isch guet, fruchtig u git Chraft für e Tag.

Am nüni füehrt üs der B’sitzer vom Casa particular mit em Outo bis Las Terrazas. Dä Ort isch no nid so alt, wil aber die Hüser umgäbe si vo Wald u ds Klima extrem füecht isch, g’seh si us zum Renoviere. Mer träffe e Sachverständige für Pflanze u Vögel im Rägewald. Är isch üse Fürhrer für die nächschte drü e halb Stund.

I choufe hie no Wasser, u de geit es los. Über ne ehemalige Pflanzwäg loufe mer i Wald iche. Scho glii zeigt er is Pflanze u Tier, wo n i vielfach nume us em Fernseh kenne. Teils si d Pflanze daheim o Zimmerpflanze i Töpf: Orchidee, Mimose, spezielli Farn wo wie Plastik sii, Tulpeböim in gälb, wo iheimisch sii (die rote si afrikanisch), die orange si de es G’misch. Teakböim, Manga- u Mangoböim, Tourischteböim mit roter Rinde (will d Tourischte vergässe, Sunnecreme i z ribe,) aber de o kubanischi Vanillepflanze.

D Vogelwält isch seeehr vielfältig. I ha ds erschte Mal e Kolobri i Würklechkeit u im Wald g’seh.

D Gsundheitspolizei isch o ungerwäg’s.

---

Nach drüü e halb Stund si mer wieder in Las Terrazas bi de See.

Mer verabschiede üs vom Füehrer (dä isch ziemli fertig, er het e missglückti Rüggeoperation hinger sech) u göh i ds Reschturant «Casa de Botes» gah ässe. Momol, es isch guet.

Em drüü chunnt üse Chauffeur wieder mit sim ‚Trabant‘ u bringt is hei.
Düschele, Chleider wächsle, Büro mache u speter no öppis z Nacht näh.

I bi hüt chley müed worde.😴

Useforderige: / Speziell’s:

Mir isch hüt dür e Chopf, wie eifach s d Schwizer hei. Gueti Ärzt, gueti Spital, meischtens g’nue Medikamänt (u we mal öppis nid erhältlech isch wird g‘ jammeret).

Die lääre Regal i der Apothek vo Viñales göh mer dür e Chopf. Misswirtschaft, fählendi Devise, Embargo ???

We bi üs e Operation i d Hose geit, luegt d IV.
Der Füehrer wär froh drum. Gäld verdiene mit erbättlete Schmärzmedikamänt vo de Tourischte isch hert’s Brot!