28. Oktober 2022 16:13

Οdos xoris onomasia, Finikas 740 60, Griechenland | 20°C

Hüt si mer es Bitzeli nördlecher, oder weschtlecher ungerwägs. Mer b’sueche der Palmestrand vo Preveli.

Für dä z erreiche müesse mer e ziemlige Boge dür d Bärge fahre. Der bekanntischt Ort isch Spili wo mer dürechöme. B’suncersch ds Wasser vo Spili kennt me. Me verchouft’s o wytume als Trinkwasser.

Üses erschte Ziel isch der Bärg Timos Stavros. Wie ne Bire steit er i der Landschaft mit er Kapälle druf. Mer wandere vo Lefkogia ueche u wärde vom Luft fasch acheg’luftet. Zytwys muess me schreg u i de Chnöi vorwärts, jede grösser Stei git Deckig. Wo mer dobe si, blast es nümm so. Hingerache loufe mer zum Dörfli Giannou u der Luft het wieder Ate g’holt.

Üse Fahrer holt üs de ab u füehrt üs zum Chloschter Preveli. Das isch wältbekannt. Näbe si re Funktion als Chloschter het es o e grossi Rolle im Freiheitskampf vo de Kreter g’spielt. I chley Müehi. Einersits locke si Tourischte a u verlange Itritt, verchoufe Heiligebildeli u viel angersch G’schmöis. Angerersyts het es de überall Verbot z fotografiere, wäg em Seeleheil u so. Naja.

Die nächschti Station uf üsem Wäg isch der Palmewald vo Preveli. Das isch uf Kreta der einzig Ort, wo die endemeschi Kretapalme wachst. Diräkt am Strand, a me Flüssli stöh si i re Schlucht. Zwar chley überloffe, wil der Strand o sehr beliebt isch zum Bade, aber immerhin sehenswärt.

Uf em Rückwäg halte mer no ds Spili für nes Kafi u wärde überrascht dür nes erscht’s Tröpfele u nes sanft’s Rägeli. No chley chrämere u mer fahre wyter bis zu üsem Hotäl ds Agia Gallini.

Später gög mer fein gah ässe, uiuiui. I gloube, das git de nächscht Wuche e Faschtezyt.

Es ganzes Ruckseckli voll Erfahrige ha n i g’macht. Es isch e ganz gueti Wuche g’sii. Morn chunnt no d Heireis über e g’wohnt Flughafe in Heraklion, de Züri, Solothurn u mit em Poschi hei.

Villicht zieht es mi wieder einisch uf Kreta.