26. Oktober 2022 12:37

Epar.Od. Apostolon-Nithavriou 113, Meronas 740 61, Griechenland | 23°C

Kostas der Fahrer chauffiert üs nach Meronas. Das isch veiechli es Fährtli. Meronas isch es Strassedörfli i de Bärge, fasch i der Mitti vo Kreta. Vo dert geit es de z Fuess stotzig der Hang düruf. Üse Wäg geit zersch dür ds Dörfli, begleitet vo bällende Hünd u dernah zwüsche Dornebüschli düre. Ds Ziel isch ds Kapälleli obe uf em Bärg. Wiu mi Chilche nid so interessiere, weiss i nid mal me, wie die g’heisse het.

Vo dert stige mer de wieder ache über ne angere Wäg u göh dernah fein i der Dorfbeiz gah ässe. Es isch äxtra für üs g’chochet worde, u de ganz fein. D Patronin, so e richtegi Mama, het d Spyse über em Holzfüür bruzlet.

Vo Meronas loufe mer i ds nächscht grössere Dörfli Amari. Bim Gloggeturm verby lande mer o hie im Dorfzäntrum. D Beizeb’suecher luege üs a u strecke d Chöpf zäme. 😉

I mache e B’suech bim Schuelhus. Ungerstuefe, Irichtig antiquiert, Vorhäng us em letschte Jahrhundert. Naja. Hät chley öppis nötig. Wil der Staat d Lehrer willkürlech zueteilt, u die wahrschynlech müglechscht schnäll wieder wäg wei, hei si kes Interrässi, sech für d Schuel i z setze. Verdiene tüe si o z weni u mit Privatstunde isch hie i däm Bärgdorf o nid viel z verdiene, – also nüt wi wäg.

Es isch i zwüsche spätere Nami u der Kostas füehrt üs bis vor ds Hotäl in Agia Gallini.