23. Oktober 2022 06:29

Mpizaniou, Ag. Vasilios 740 56, Griechenland | 12°C

Üsi erschti Tour füehrt üs vo Mélambes nach Saktoúria.

Der Morge verlouft fasch scho chley im Trott. Ufstah, düschele u em galbi achti gah zmörgele.

Am nüni holt üs der Chauffeur mit em Busli ab u füehrt üs nach Mélambes. Die Strecki, wo mer denn mache laht üs wunderbar uf ds Meer lah luege. Leider loufe mer o i wyte Teile dür versehrt’s Land. Dä Summer het es uf Kreta b’rönnt u d Hingerlasseschafte g’seh nid schön us. Usserdäm isch geng no sehr troche. D Herbscht- u Winterräge chöme ersch no. (Es het zwar letscht Wuche strichwys Unwätter g’ha uf Kreta.) Für die trochni Landschaft wieder z wecke brucht es lang adurend’s Rägewätter.

I me Halbkreis loufe mer um e öppe 950 Meter höch Vouvala. Ungerwägs si einzelni landwirtschaftlechi Boute u ganz abg’lägeni Kapälle. Bi eire vo dene träffe mer e ganze Schwarm vo Gänsegeier, wo ihrer Kreise am Himmel zieh. Idrücklech, aber mir si äuä nid ds Ziel vo dene Vögu. 😅.

Nach knapp zwo e halb Stung chöme mer i ds Dorf Saktoúria. Dert steit ds Outo scho parat.

Der Räschte vom Namittag si mer de ds Agios Pavlos, eme Tourischteörtli a der Küschte.

Es het mehreri Reschturant, mehreri Sandstränd, interessanti Felsformatione u n es Meer i de schöns hte Farbe.

Am vieri mache mer is uf e Wäg zrügg zum Hotäl ds Agia Galini. Da göh mer später o gah ässe. I isse wieder einisch Fisch. Ds Täller isch aber so überlade, dass i nid alles mah. Der Chällner erkundiget sech, ob i chrank sig. 😂