22. Oktober 2022 12:36

EO Faistou Agias Galinis, Festos 702 00, Griechenland | 22°C

Flüge, e klimateschi Todsünd, aber ds Flugzüg isch voll – oder ömu fasch. Nu ja, i sueche für mi d Entschuldigung, dass ig ja süsch ganz ordeli läbe. 😏

Itz bi n i mit eme Airbus vo der Edelwyss über Sarajewo, uf em Wäg nach Kreta.
Bim Start ds Züri isch Wätter g’sy zum Dervoflüge, itz g’seh n i dusse zwar Wulche, aber d Sunne schynt.

Ds Zmorge, wo serviert wird, laht mi lah stune, es isch sogar guet u später git es no es Biberli. 😄 (Trotzdäm dass es de Flugg’sellschafte schlächt göng.)

Verusse wet i, trotz Sunne, nid sy. Knapp 12’000 Meter obe isch es minus 59°C – mer hei no e halb Stund u ds Heraklion isch es de 19°C.

U de geit plötzli alles ganz schnäll, lande, usstige, mit em Bus zum Flughafegeböid, Koffere usesueche u de wartet scho der Bus (oder ds Busli) wo üs zum Hotäl bringt. Das steit ds Agia Gallini, was e rächti Outofahrt quer über d Insle mit sech bringt. Gäg die eis chöi mer Zimmer bezieh. U de muess i zersch afe einisch ‹a cho›.

Sächzger, siebezger Jahr isch das Geböid, aber es längt. Es is h suber u mis Zimmer isch e Halle u nid e Chapsle 😜.

I gah schnäll gah Wasser choufe. Das vom Hahne chlörelet. Hundert Meter vom Hotäl isch der Giftkläffer, wo uf mi wartet. Chlyn, wulig, wyss u zwirblig. Irgendwie düecht mi, dass hie zu jedem Hus e Hung g’hört. Nüt schön’s, aber lut! We der Giftkläffer öpper uf der Strass merkt raset er use u faht a u de kläffet unger einisch ds ganze Dorf.

Mys Schläfli, (für d Chapsle z kompensiere), isch also nid ganz ung’stört. Es loufe anschynend no angeri bim Kläffer verby. 😏
Später gah n i zum Strand ache. (Mit der übleche akustische Begleitig). Mer träffe üs dert i der Gruppe zum ga Znacht z ässe. Vorhär muess i aber no der Hafe erkunde. E ganz usserg’wöhnleche Bou, wo da i ds Meer use luegt. Gnue gross, für ne ganzi Flotte.
I me Beizli mit Sicht uf ds Meer trinke mer eis u später, im obere Stock git es wunderbar z ässe. Ig läbe ganz guet.
U de ersch schlafe tue n i;- wie n es Herrgöttli!😃