8. Oktober 2021 11:17

Unnamed Road, Oropedio Lasithiou 720 52, Griechenland | 24°C

I höckle i der Tavärne Despina. Mer ässe hie Znach u es isch griechisch wunderbar! Grüne Salat mit Sunnebluemechärne, Rättechsalat mit Orange, früsches Brot mit Olivepaschte, Schafsjoghurt, gäubem Ärbsemues u bratnem Schafschäs. Was isch das für n es schöns Läbe! U das isch ersch d Vorspis g’sy 😋. Nu guet, mir hei’s verdienet.

Hüt si mer am nüni g’startet u i ds Landesinnere g’fahre. Über Neapoli (neue Stadt) si mer zur Lasiti Hochäbeni g’fahre.

Es topfäbnig’s Gebiet zmitts i de Bärge. Vo dert us hei mer de e Bärgwanderig g’macht. Der Bärg Karfi isch ds Namittagsziu g’sy.

Öppe em drüü si mer wieder ache cho; – si wieder nach Elounda g’fahre u itz fire mer der letscht Abe.

Der nächscht Gang  isch Fleisch mit eme Chürbissösseli (ig berchume e Art Spinetchueche) derzue G’mües ( Obergine, Peperoni, Rüebli u no viu meh) Uf em Tisch stöh o no Pommefrit – sogar die wärde g’gässe.  Derzue git es griecheschi Musig, viiu Wy (für ne Teu), chaut’s Wasser u ifregi Chäuner.

Zum Dessäär bringe si massehaft Frücht u ne guete Espresso.

Mau luege, wie de morn d Verpflegig im Flugzüüg isch. 😉