7. Oktober 2021 10:23

Unnamed Road, Ag. Nikolaos 720 53, Griechenland | 22°C

Hüt hei mer ‹frei›. Irgendwie het es sech nid ergäh, dass ig mit öpperem abg’macht ha zum gah loufe. Viu wo n i mit ne g’redt ha, hei wöue gah lädele u de gah bädele. Aber i finge, i ha ja nid Badeferie g’buechet. Drum briche n i allei uf. Es isch zwar scho wieder eufi, aber was söu’s. I ha beschlosse, dür d ‹Hingertüre’z luege. Drum loufe n i nid gäge ds Meer zue, sondern der Hoger düruf. Üses Hotäu isch riesig. Das si sicher um die füfzg Hüser, wo da em Strässli nah stöh. Z oberscht si de no Muure u derhinger e grossi Ghüdergruebe. Mit chley Glück überwinde n i die u g’seh der Wäg z spät, wo drum ume g’füehrt hätti.

I loufe wyter dä vertröchnet Hang düruf u plötzli g’hört me wieder Vögu u n es ganzes Arsenau vo Insekte. Es isch rächt  stiu, so gäge Mittag zue, nume es Alarmhörnle vom Hotäu här g’hört me.

Mi Wäg füehrt mi i me wite Boge dür ds Hinterland. Zersch loufe n i gäge Plaka eme ehemalige Fischerdorf. Das geit gäge Südoschte. Dür ne zueg’wachsne Wäg chume n i zu de erschte Hüser, – we me däm so cha säge.

Zämeg’schueschtereti Brätter- u Plastikverschläg. Drinne es paar Schaf, es paar Hüehner u dervor ei oder zwe Beiistöck.. Das Ganze isch i ghaget, mit auem, wo sech laht lah bruche. Irgendwo isch mindeschtens ei Chöttihung. Meischtens si mehreri u tüe, aus müesste si e Wäutchrieg füehre. Si tüe mer leid, die arme Hüng, si stranguliere sech fasch, – we si aber los chäme, hätt i nid viu z lache. Na dene ‹Burehöf› mache n i e Wändi u gah em Hang entlang gäge Weschte.

Bedänklech, wiviu Grundstück z verchoufe si. U o die ersteute Boute, wo verchouft wärde, si ‹luxury›. Da isch äuä e Huufe Gäud ume, a dere Bärgsyte. U we fertig boue isch, steut me e riisigi Muur drum, – villicht o für au die G’hüderhüfe nid müesse z g’seh.

D Gräbe u d Gräbli, aber o d Schafweide, si meh oder weniger e Abfauhaude. Mit däm verdienete Gäud chönnt me doch e besseri G’hüderabfuehr organisiere? Aber villicht wird das Verdienete für ne Villa brucht, oder für e grüen Rase dervor.

Scho verruckt, überau uf Kreta wird wasserspare propagiert, aber wär ds Gäud het, cha der Goufplatz o im Summer grüen phaute.

Schad, dass die aute Windmühline verg’heie, die chönnt me doch aus Attraktion bruche. Es isch zwar viu hie nach em Tourismus usg’richtet, aber es muess de scho höchg’stoche sy. Für Fuessgänger wird weni g’macht; – es fahrt ja o aus Outo.

Über Kato Pines, verby a Epano Elounda, Kato Elounda nach Schisma Elounda, u dert git es es Kafi u viu Wasser. Es isch i der Zwüschezyt vieri worde. Am füfi bi n i im Hotäu u ha viu Zyt, bis zum Znacht