6. Oktober 2021 09:08

Unnamed Road, Ierapetra 720 59, Griechenland | 19°C

Früech stöh mer uf! Früech stige mer i! Früech fahre mer ab (07.30), quer über d Insle, i Süde. Ja das cheibe Outofahre, – aber ohni das chunnt me nid wyter uf dere Insu. E Isebahn isch niene ume.

D Landschaft isch im Süde vo Kreta prägt dür viu Tribhüser. Hie wird praktisch ds ganze Jahr G’mües a bboue. Tribhüser brucht’s aus Schutz vor em Winterräge.

Nüni füfevierzg git es es Kafi i der Bucht (35.0272350, 25.8921485) am Abe wärde mer hie o Znacht ässe.

Chley später fahre mer zum Chloschter Kapsa. Es isch ganz chly, het nume no es paar Möche, – aber si nähme’s ganz genau. Kener Föteli vo ne u o kener i der Kapäue! ⚡ Es isch trotzdäm schön.

E haube Kilometer dernäbe faht üsi Wanderig a. Mir loufe dür ne Schlucht düruf. Perivolakia heisst die. Es isch wunderschön u asträngend. Nach em Mittag si mer im Bärgdorf, am Afang vo däm Ischnitt, wo glych heisst wie d Schlucht. I re Tavärne, oder fasch privat, wärde mer verpflegt. Früsch us em Garte: Tomate, Gurke, Zibele, Bohne … was ds vegetarische Härz begährt.

Vo da füehrt der Wanderwäg  der Bärg dürab u mir lande wieder bim Chloschter. Der Michaelis füeht is de i d Bucht zrügg zu me Znacht mit meh aus volle Täuer. Nach e re g’füllte Tomate u re g’stopfte Obergine muess i Forfait gäh. 🤪

Bi me Americano-Kafi g’niesse n i d Zyt u verbriche die paar Zyle. Später, mer schlafe scho fasch, wärde mer hei chauffiert (21.30) 😔

Kalispera, häbet e schöne Abe!