5. Oktober 2021 15:33
Akti Olountos, Ag. Nikolaos 720 53, Griechenland | 20°C
Kalimera! Hüt isch chley e fuule Tag. I ha hüt frei 😊. Drum gah n ig ersch am achti gah zmörgele u g’niesses. Speter ha n i mit der Martina abg’macht, dass mer göh ga loufe.
Am eufi göh mer los, i Richtig Elounda. Dert muess i no Elektrozüügs kömerle. I ha nid dra dänkt, dass i ja d Föteli vom Föteliapparat no muess im Netz sichere. Mit zwene Übergangsstecker isch das Problem g’löst.
Ersch gäge die eis loufe mer über e schmali Landbrügg uf d Haubinsle, wo mer aus Ziu usg’läse hei.Eigentli heisst das Eiland ‹Spinalonga›. Im Louf vo der Zyt het sech aber i bürgeret, dass e chlini Näbeinsu so heisst. Die isch äbe o berüehmter, oder berüchtigter, wiu Griecheland da über langi Zyt die Leprachranke ‹deponiert› het.
Nu guet auso, mir loufe der südleche Küschte nah u bewundere die wunderbari Farb vom Meer. Ds Wasser isch sehr intensiv türkis. Uf em Land g’seht’s wäsentlech trischter us. Es isch troche brun u o viu Büsch hei der Summer nid überstande. Obschon die Halbinsu fasch nume zwe Strasse het, si ziemli Outo ungerwäg’s. Schad! D Eloundianer fahre zum Bade uf d Insu use, u wenn si chönnte, no fasch i ds Wasser. Da wo ds Strässli ufhört, stöh si de, die Chäre.Hingedranne, im Meer si de d Bootstouchter.
Mir loufe bis zu re Chiuche u mache es Pöiseli im Schatte. Vo dert überquere mer d Insu gäge Norde bis zu re Asammlig vo Geissestäu u dert verpasse mer de der richtig ‹Wanderwäg›. Wie sturmi Hüehner sueche mer is der Wäg zwüsche Stachubüschli.😗 DMartina chunnt i ds Jammere. Nach öppe re Stund finge mer de der Wäg wieder. Ir Zwüschezyt si mer uf der Nordsyte u g’seh d Ortschaft Elounda wieder.
Vo da wäg gwit es nümm so wyt u mir hei der Wäg g’schafft.
Der Abe verlouft wie g’wohmt: guet ässe. Es wird spät. Für ds Veröffentleche längt’s nümm. Jassou!
