4. Oktober 2021 11:22

Unnamed Road, Ag. Nikolaos 721 00, Griechenland | 24°C

I wiederhole mi. Der Morge im Hotel isch wunderbar. Ds Wätter isch perfekt u d Sicht uf ds Meer passt o. Zum Zmorge wie immer es Angebot, wo n i nie usschöpfe cha. 😊

Mit em Michaelis fahre mer de um die nüne wieder wäg. Kritsa isch üses Ziu. Mer fahre zersch zu re uraute Kapälle. Das ganze Geböide isch g’wachse, erwiteret u umbboue worde u innedrinn si urauti Freske, wo me reschtouriert het.

Es isch idrücklech u aber de o mit Fragezeiche z g’niesse, so ne Kapäue. I muess de irgend einisch use, – u ha ne Diskussion über Religion … 😏

Mer fahre dernah i ds Dorf u bewundere die griechische Bou- u Läbeskünschtler. Gässli uf, Gässli ab, – Gässli übere… Toll, u lädele cha me o no!

Später, höckle mer imne Kafi in Kritsa u g› niesse ds Läbe (u guete Kafi).
I bewundere, wie d Natur i ds Boue i bezoge wird. Der Bank u ds Bankchüssi im Café si genau em Boum u em Stamm im Garte a passt. 😉

Mer fahre de witer bis i ds Dörfli Krustas. Da faht üsi hütegi Wanderig a. Dür ds Tal dürab, – i Richtig Meer.

Dä Wäg isch die auti Zuefahrt, der Esu-, Ross-, oder Muultierwääg zum Bärgdorf Krustas. Ungerhaute wird är äuä nümm gross, – entsprächend steinig isch es de ungerwägs. ‹Was bin i doch froh um miner Bluejeans›! Aui die mit de haublänge Wanderhösli hei d Bei äberächt frei für d Stachubüschli ungerwägs; – u um miner Stöck bin i o no froh, mängisch brucht me meh aus zwe Pünkt zum ds G’wicht ab z stütze.
Zringsetum isch Natur pur! zunderscht im Tal isch e Fluss, – itz natürli ustrochnet. Im Winter aber wird’s uf Kreta e längeri Rägezyt gäh, – de fliesst de ds Wasser wieder u ds Gras, d Strüchli u d Böim chöi wieder usschlah.

Irgendwo, bi re Kapäue pignigge mer wieder u loufe de anschliessend wyter dürab, bis zum Träffpunkt mit em Bus. Dä füehrt üs nach Istro. Dert, am Meer, het es e Sandstrand. Es wäuelet rächt.  Der Luft chunnt. Die jüngere  gö i ds Meer u n ig u es paar angeri si z fride mit Föteli u me guete Kafi.

Ja u de anschliessend füehrt üs der Michaelis wieder zum Hotäu. E tolle Tag! U itz wartet no ds Znacht.