2. Oktober 2021 14:43

Epar.Od. Agiou Nikolaou – Vrouchas, Ag. Nikolaos 720 53, Griechenland | 20°C

Es isch haubi vieri. I bi parat, – oder ömu so öppis wie. Mit chley chline Ouge warte n i druf, dass ds ‹Nachbertaxi› vorfahrt.

Suuuber, vieri zäh, i hocke im Zug gäge Züri. Ds Dori isch suverän bis i Bahnhof g’fahre (merci no einisch), u i sueche mer der Wäg uf ds Perron. Erstunlech, wiviu Lüt im Zug hocke u zum Flughafe wei. – E Zug vou jungi Lüt. I chume mir fasch chley antiquiert vor: Biliee mit em Händy choufe u i Zug i stige…  Miner Begleitende hei da wäsentlech weniger Problem. Zum Teil müesse Biliee no vo der Kontrolle g’chouft wärde eine het sis iFon nid g’lade. (Notladig pär Pouerbank – u de isch de glych nid es gültigs Biliee druff 🤪). Jaja, d Juged 😀

D Gufere isch scho mau ungerwägs. Itz no dür d Sicherheitskontrolle, – aber vorhär es Kafi. – Wär vo dene Lüt chunnt ächt nach Kreta?

07.20 i warte, dass ds Boarding nach Kreta a faht.

🤯

Me sött chönne läse! 58 isch nid 85. Irgendeinisch chunnt e schnälle Transfer dür e Flughafe. Bim A85 wartet d Flugere scho. I hätt ja füeglech Zyt g’ha. Wäge höchem Flugufkomme uf Kreta warte mer no e Viertustung em Bode.

Nu ja, itz bi n i dinne. Achti nullnull bewegt er sech.

Em zwänzg ab achti si mer über de Wuuche. 1935 km lige vor is.

Am nüni si mer über Kroatie: Blau un es par Insle.

Es Chäschüechli im Truckli serviert d Swiss zum Znüni. Toll! Un es Kafi git es o. Üse «Cheesflüger» isch über der Adria. Aber der Kurs füehrt üs gäng der Küschte nah. Es het zwar viu Wulche, trotzdäm isch es toll, die chlyne Inseli z g’seh: – i ha äbe e Fänschterplatz.

Ja u irgendeinisch chunnt de Kreta in Sicht. I re beidruckende Kurve flüge mer Heraklion a. Ds Lande rucklet zwar chley, aber es geit aues guet. Mir stige us u wärde mit em Bus zum Empfangsgeböide g’bracht. Dert het es Polizei (?), wo je öppe zwo Sekunde ds ‹Zertifikat› a luege. Meh aus der Barcode hei die sicher nid g’seh. Dernah geit es scho zur Gepäckusgab. Das wird e ziemlechi «Gofere-G’schou», – ändlos, bis äntlige die us üsere Flugere dra chöme.

Bim Usecho wartet scho d Barbara, d Reiseleitere wo bi üs isch. Itz g’seht me äntlige o, wär de eigetli aues i dere Wandergruppe isch. Huiii! Siuberfischli, wo häre me luegt! Teu hei zwar d Haar rot (oder so) g’färbt, aber …. Nu de.

Mir fahre zum Hotäu, es git es längs Prozedere zur Begrüessig (Guetschine u so) u n es fein’s Getränk.

Ds Hotäu ligt öppe e knappe Kilometer usserhalb vo Elounda, besteit us viune Geböide, chline u grosse, viune Bars u Reschturants, Pools, Räseli, eme Fitnesszänter mit eme Spa. Tja.

Vor em Z’nacht loufe n i no em Meer nah, bis i d Ortschaft übere u wieder zrügg.

Zum Znacht isch es riisig’s Büffee ufg’steut, – u n ig gah gly drufabe i ds Bett.