3. Dezember 2022 09:49

Unnamed Road, Jordanien | 17°C

Hüt erwache ig i me grosse Bett, alles schön pützerlet u suber; -bis uf, d Dusche wo es Problem mit der Höchi het. I bi zwar nid der Grösscht, aber e Meter zwänzg längt mer nid zum Düschele. E Bitz Plastik schafft Abhilf. Na ja, sibezger…

Derfür isch d Ussicht vom Zimmer us diräkt uf ds rote Meer grandios.

Die nächschte Tage tüe mer individuell plane. I wott hüt nach Akaba i d Stadt. Em elfidriissg fahrt Shuttlebus.

Dä bringt üs o prompt bis zum Mövepick i der Stadt. Mir si e gsnzi Tschupele vo üsere Gruppe. Dernah verteilt sech dä Hufe. Mer göh gah Lädele, – meine mer. Zwe Taxischofföre anerbiete üs e Tour. Mer löh üs lah umekutschiere, vo der osmanische Burgruine zum nautische Aquarium u wieder zrügg. Drü Pärsone, sibe Dinar e Stund; – ok, das ligt drin.

Aber nachhär göh mer gah lädele. Was da alles a bote wird. Guet, teilne Sache g’seht me a, dass si scho länger im Agebot si. Aber me muess o nid alles choufe, teil Sache luegt me o eifach a u schnödet chley.

I choufe mer es Tutti-Frutti u chley G’würz. Nach all däm Luege u Loufe müesse mer gah käfele. Diräkt gägenüber vom Strand isch es Gartekafi.

Gäg die Drüü göh mer zrügg zum Stadtmövepick. Plötzli si mer vieli u alli wei Bus. Tja, we me höflech isch u Vortritt laht, isch me plötzli ohni Sitzplatz! Em Schofför tuet’s leid, er darf kener stehende Passagier mitnäh; – also stöh mer z dritt uf der Strass. Zwe düts hi Dame u ig. Mer göh uf d Strass use u de chunnt scho der Schofför vom Vormittag. Miner zwo Begleiterinne hei nume Dollar. Der Fahrer meint, de müess är füfezwänzg ha. I ha jordaneschi Dinar, mi Priis si füfzäh Dinar für drei Pärsone. (Umrächnig:1 Jordanischer Dinar entspricht

1,41 US-Dollar 😯) I zahle u säge dene Dame, Gisela & Gundula) si chönne mi ja zum Kafi i lade, wenn si mi g’seihe. Mer si zur glyche Zyt zrügg im Hotäl wie der Bus. 😉

Itz höckle n i uf em Balkon. Der Luft geit ziemli, trinke es Kafi u schnouse Tutti. Es isch füfi u scho bald git es wieder Znacht.😋