2. Dezember 2022 05:38
Siq Um Al Tawaqi, Jordanien | 10°C
Es isch morge, am halbi sibni u i erwache vom Handyton i der Felsewüeschti. – Tja, eigetli scho geng no im Camp Aladdin, aber o d Beduine hei hüt Strom, Heizig u warm Wasser. Alle Komfort, nume d Zältwänd si no us Stoff.
Düschele i der Wüeschti, das geit. We me em Abe vorhär der Boiler i g’schalte het, git es sogar warm Wasser. Dernah der Räschte i d Goffere packe: alles was me füreg’schleipft het.
Dusse isch rächt chalt. D Sunne wärmt de, aber im Ougeblick lüchtet si nume die oberschte Spitze vo de Bärge a.
Ds Zmorgebüffee isch mindischtens so gross wie ds Znachtbüffee. Was druf isch? Jaaaa me muess sech apasse. Es het kener Mütschli u Gipfeli, aber me cha o uf me Fladebrot es Ankeböckli striiche. 😀 Der Kafi isch dünn, aber derfür git es G’mües, Olive, Hummus, o pürierti Bohne, Joghurt u verschidene Arte, Falafel, Salät, G’mües, Fleisch u weiss nid, was no.
Nach em Zmorge müesse mer mit em Gepäck verusse warte. D Sunne wermt u n es wyters Kafi ligt drinne. Em halbi nüni chunnt der Tareq, begleitet vo mehrere Fahrer. Üses Ziel isch ds Wadi Rum (Wadi Ram). Mit 4×4 Toyota Cruiser wärde mer i d Stei- u Sandwüeschti use g’füehrt.
Es isch o es wahnsinnig’s Erläbnis, i dere Wüeschti usse z sy.
Chley meh Wüeschti-Idrück?
Guet, dass das mit Landcruisers muess si, isch i der hütige Zyt sicher fragwürdig. Aber d Jordanier, b’sundersch die Junge, fahre gärn Outo – u de am liebschte e G’ländecharre. Wahrschynlech würde si o ohni üs umebloche. Erstunlecherwys fahre si aber i bestimmte Pischte. Da si si ziemli konsequänt.
Ds Wadi Rum isch Wältnaturerb vo der Uneso. D Natur macht o hie teilwys zwöite. Schad. Aber ds 🐫 isch dür e 🚙 abg’löst worde. Einersit’s verstah n i die Iheimische, anderersyt’s vwrstah n i nid, dass nid meh Sorg g’ha wird. Abfall i der Wüeschti isch ke Visitecharte.
Stolz si si, dass der Film «Lawrence vo Arabie»hie isch drähit worde. Überall wird da druf häre g’wise. Guet, e grosse Teil, vo däm wo me kennt, isch em Filmepos z verdanke u dene grandiose Landschaftsbilder. Der g’schichtlech Hingergrund spilt e ungerg’ordneti Rolle. Aber d Natur isch hie o unübertroffe.
Nach em Mittag, mer ässe i re Art Raschstätt, fahre mer i Richtig rot’s Meer. D Hafestadt Akaba isch üses Ziel. Bis mer dert sy, geit es no es Zytli. Mer b’sueche der ‹Houptbahnhof› vom Wadi Rum, kömerle chley hie u da. Na de drüü si mer de i dere Hafestadt. Tourismus! Allerdings äuä meh inländische. Die sige morn wieder wäg, seit der Tareq. Mal luege. Mer fahre no knapp zäh Minute zum Hotäl.
Mövepik, chley siebezger, aber sehr gross, diräkt am Meer u suber. Ds Büffee isch toll, – i läbe sehr guet!
I muess hüt mit de B’richte nacheschaffe. I der Wüeschti ha n i zwar Strom g’ha, aber ke Telefon u Internet.
