Jordanien 2022

 

1. Dezember 2022 19:21

Siq Um Al Tawaqi, Jordanien | 13°C

blank blank

 

blank

blank

blankD Technik wird i de Felse vo der Realität i g’holt. Ke Internet bedüted o ke Webbytrag. Nu de, itz heit der chley müesse warte.

blank

blank

I schlafe hinech zmitts i der Wüeschti, i der Nechi vom Wadi Rum, bi de Beduine im Camp Aladdin. Vor zwo Stund het es Znacht g’gäh: es isch ganz guet g:sy. Teilwys isch o ds G’mües i me Art Ärdherd g’chochet worde. Es isch natürli zelebriert worde, wo ds Ässe usezoge worde isch. (Der g’röscht Teil isch allerdings Fleisch g’sy.) Churzi Zyt später isch ds Büffet uftischet g’sy u me het us rund zwänzg Salatplatte u vielne G’mües chönne wähle. 😋

Nach em Ässe hei si d Disco g’startet. Es louft beduinisierte Pop i re Lutstärki, dass o ig i mire Beduineb’husig, zwöihundert Meter i der Schlucht inne voll bedient wirde. Na ja …

Settig Beduinecämps git es hie massehaft. Alli hei ähnlechi Programm, – es Volk wo mit Tourismus i d Nöizyt übere chunnt u derby es Stück vo sire Identität verliert. I bezwyfle, dass die Alte da mitchöme.

blankblank

Der Morge hei mer ds Petra verbracht. Nach nume eire Nacht im Petra Canyon Hotel (nöi Petra) hei mer früech uschecked u si zum Igang vom Petra vo de Nabatäer (ungef. 1Jh. vor Chr.). Petra bedüted Fels. D Nabatäer hei ihri Stadt total im Felse versteckt. Si hei’s verstande, mit de Römer zrächt z cho u vo de Handelskarawane z profitiere, wo bi ihne verby si cho, oder wo si zu sich umg’leitet hei. Wo später d Römer i d Karawaewäge i g’riffe hei u die Händler us’blibe si, het sech Petra entfölkeret. Derzwüsche lige mehreri Jahrhundert, wo ’s däm Volk guet g’gange isch. Zwar isch Jordanie vo Ärdbebe heimg’suecht worde, d Römer hei um’boue, verschiedenschti Berberstämm hei i de Ruine g’läbt, trotzdäm isch erstunlech, was immer no vo de Nabatäer z g’seh isch.

D G’schicht vom Basler Burkhard chöit der sälber nacheschlah. Wichtig z wüsse isch eifach, dass är Petra «entdeckt» het. Ohni ihn würd d Unesco die Schlucht nid zum Wältkulturerb erklärt ha, u wär Petra nid eis de nöie Wältwunder. Es chäme nid jede Tag mängisch tusegi vo Lüt (guet, das wär nid schlächt, chley weniger) siebe Tag i der Wuche, 365 Tag im Jahr. Die Beduine hie läbe nume no vom u für e Tourismus.

D Händler rund um das Petra si penetrant u äbeso seeeehr zahlrich. D Strasse si g’süümt vo Uslage u meh oder minger ufsässige Froue, Manne u Ching wo wei Gäld verdiene. A bote wird alles, Charte, Büecher, Heftli, Tüecher, Chleider, Figürli, Schärbe, Steine, g’fälschte Münze, rite uf em Ross, em Esel, em Kamel, em Elektrocharre, und und und. Es git Füehrer, Beizer, Kaffee- u Teeverchöifer u sehr viel, wo eifach d Nase u ds Muul drinn hei.

U trotz allem: we me ds ersch Mal dür d Schlucht geit u ds Schatzhus g’seht uftouche, wird me scho chley ehrfürchtig. Dä Ort z g’seh het zu mi ne grössere Ziel g’hört. Es het sech jedi Minute g’lohnt. I hänke no e Schwetti Bilder a u villicht teilet der mini Begeischterig.

blankblank

blank

Hinech schlafi itz also im Beduinezält (we me däm so cha säge) u hoffe, es sig de nid z chalt. 🥶