30. November 2022 17:56

35, Jordanien | 14°C

Ds Wätter isch besser worde. Aber…

I muess scho am halbi sächsi ufstah, für em halbi sibni zmorge z ässe, – dert isch aber niemer. 😕 Ersch am Viertel vor sibni chöme die angere; – ds Zmorge sig verschobe worde. Nu de.

Em achti steit der Koffer vor der Zimmertür, em halbi nüni fahrt der Bus.

I der Zwüschezyt isch es scho rächt sunnig; aber chalt. Mer hei e Monsterstrecki vor is. O we d Strass, wo mer druf si, d Chünigsstrass sig.

Der erscht Halt isch uf em Bärg Nebo. Gloube isch hie fasch gryfbar. I ha’s de gly einisch g’seh.

D Mosaik u d Härstellig dervo interressiert mi de aber scho. Mer göh i ne Wärchstatt, wo Händicäpierti so Puzzle mache. Es git äuä nüt, wo da nid mit Steindli beleit wird: Stüehl, Tische, Vase, Bilder, Schränk, und und und…

Es isch aber o n es grosses G’schäft. Die ganzi Gäged verchouft Mosaik. 🤔

Ds Mittagässe isch im glyche Stil, wie mer g’wahnet si: wunderbar. Si hei e Art Nationalg’richt g’macht. Das heisst Maqluba was soviel wie ‹uf e Chopf g’stellt› heisst. I me grosse Topf wird ds Fleisch, öppis G’mües u Riis mit allne G’würz i g’schichtet, g’chochet u de vor em Gascht wie n es Grieschöpfli g’stürzt. We dä Gupf zämeblibt, si d Chöch b’sungersch stolz.

D Wyterfahrt füehrt üs dür e «Grand Canyon vo Jordanie». E Landschaft wo eim beidruckt u wo so einzigartig isch. Der Wadi Moujeb Canyon dürfahre mer leider nume. Es wär e Ort für ne eigeti Feriewuche.

Uf em Wäg b’sueche mer de no d Chrützritterburg in Kerak u fahre vo dert wyter nach Petra.

Ds Hocke tuet eim afe chley weh. Im nöie Petra ässe mer Znacht u göh der ah i ds Hotäl «Petra Canyon». Ja, hie läbt nünzg Prozänt vo de Lüt vom Tourismus.

Am halbi nüni bi n i i me Zimmer, mache Büro u pfuuse dernah.

Morn geit es wieder früech los.