29. November 2022 07:05

XW73+RWJ, Amman, Jordanien | 11°C

Es rägnet. Richtigi Rägewulche, verhänkte Himmu, Blitz u Donner, nassi Strasse präge das Morgebild. Für ds Land isch es guet, für üse Ufenthalt e Abwächslug. 😀

Nah de sibne git es Zmorge u am nüni mache mer is wieder uf e Wäg. Es geit zur Römerstadt Gerasa, oder itz Jerash, wo no ganz guet erhalte sig.

Es git wieder e ziemli längi Fahrt, – u de no mit Räge. Aber itze halt, o in Jordanie si die sehenswärte Sache nid uf eim Hufe. Mer b’richte chley im Bus u de geit d Zyt o verby.

Scho vo wytem g’seht me in Jerash ds grosse Hadrianstor. Derhinger verbirgt sech aber e römeschi Wält wo sinesglyche suecht. Mer mache alli grossi Ouge. Der Räge het ufg’hört. Es isch zwar geng no bedeckt, aber scho e ganze Birz fründlecher. So macht ds Erkunde vo dere riesige Flächi Fröid! Ig ha no nie so ne grossi Flächi mit römische Ruine g’seh u ne riesige Teil vo der Stadt sig no gar nid us grabe.

Trotzdäm dass über Jahrhunderte Lüt i dene Ruine g’läbt hei isch weni kaputt g’macht worde. Dank internationaler Hilf si vieli Boute o wieder härg’richtet oder rekonstruiert worde.

Es isch e grandiose Idruck, wo mir da blibt.

In Jerash göh mer o gah zmittag ässe. Das wislet u täselet da um üse Tisch ume. Chällner um Chällner bringe Schüsseli, Tällerli, Näpfli u alli si mit de köschtlechschte Spyse g’füllt. Teigtäschli mit G’müesli u Chrütli, Wybletter, o wieder g’füllt, Hummus, Quark, Salät, G’mües u derzue früsch’s Fladebrot. D ‹Roubtier› berchöme Spiessli mit Huehn u Schaf, – aber i g’seh meh als g’nue für mi u kenne dervo nid d Hälfti.

Nachär fahre mer bis Ajloun zu re wytere Burg: Qala‘at ar Rabad. Die isch 1184 nid vo de Chrüzritter, sondern vo de Araber boue worde. Sie het lang als Verteidigung u Bollwärch gäge d Chrüzritter dienet. Klar, dass der Tareq stolz isch u üs die Burg het wölle zeige. U o das isch es idrücklech’s Bouwärch.

Der Rückwäg isch läng u der Tareq meint, we öpper merki, dass är d Ouge zue heig, tüei är nid öppe schlafe, är plani die nächschte Sehenswürdigkeite wo n är üs zeigi. – I ha de uf em Rückwäg d Planig für ne überno, b’sungers will es wieder a faht rägne. 🤣