28. November 2022 19:34

Hüt stöh d Wüeschteschlösser uf em Programm. Derfür, dass mer die g’seh, müesse mer afe einisch zwo Stung mit em Outo fahre. Am nüni steit der Bus vor der Türe u mer tube ab. Der Fahrer biegt müglechscht schnäll uf d ‹Outobahn› i, – oder ömu uf die Strass, wo als das gilt.

Es isch viel im Bou u der Fahrer dirigiert das Büssli vo eir Strassesite uf die angeri. Notabene si mer de o nid allei. Es het Vercher wie wahnsinnig. Der Tareq, der Frömdefüehrer, het g’seit, uf jede Jordanier chöme zwöi Outo. Öffentleche Vercher existiert nid. Die einzegi Bahnlinie, wo länger isch g’sy isch im zwöite Wältchrieg kaputt g’macht worde. Hüt isch nume no e chline Teil i Betrieb als Industriebahn.

Der Strass nah blinket die ganzi Landschaft nach Amman. Plastik u Fläsche präge d Umgäbig näb der Strass. Schad, würde d Jordanier die Stoffe als wärtvoll a luege, si chönnte rych wärde. Wyter wäg vo der Houptstadt wird de d Landschaft chley süberer, derfür het es überall Deponie vo Steine, Schutt, G’röll.

Üsi erschti Station ligt i der Oase Azraq. D Oase isch scho sider prähistorische Zyte besidlet. Im Louf vo der Zyt isch hie e befeschtigte Bou entstande, wo strategisch wichtig u zu me Schloss usboue worde isch.

Einersyts si hie Jagde vo de Kalife veranstaltet worde angerersyts isch es o e Verteidigungsbou g’sy. So im achte Jahrhundert isch die Alag höch im Kurs g’sy.

Später sig de hie o der Lawrance vo Arabie hie g’huset u heig sis ‹Büro› hie g’ha. 🤣

Zmittag ässe mer wieder super guet.  D Beiz g’seht fasch us wie ne alti Karawanserei. Aber de o nume fasch …

Nachhär fahre mer zu me alte Luschtschlössli. Qasr el Amra g’hört zum Wältkulturerb. Der Tareq wird nid müed z betone, dass das lang vor der Islamisierig sig boue worde. D Römer heige hie die blutte Froue a d Wand g’male. Währed em Islam wär das nie g’macht worde. 😂

Vo dert fahre mer no zu re richtige Karawanserei. Qasr el Kharanah isch u der Äbeni ganz allei. Zwar isch o hie e Teil vom Gebäude verfalle, aber no geng steit si wie ne Burg i der Wüeschti. Wehrhaft u massiv, als Ungerkunft für Karawane, wo ungerwäg’s da verby si cho. Teils isch si Ungekunft, teils Wehrburg.

I me Boge fahre mer de wieder nach Amman z’rügg. Viel-viel-viel Verchehr prägt das Heicho. Gäg die füfe si mer de wieder im Hotäl.

Da git es Kafi oder Tee

I gah mit angerne no einisch i d Mall übere. Dert het es e Italiäner-Jordanier-Beiz, wo n ig es Salattäller isse. Dernah gah n ig wieder zrügg, mache Büro u sueche am zähni es Huli. 😊