27. November 2022 13:14
XW67+96W, Amman, Jordanien | 14°C
Am Paris Square Street Food g’niesse, das isch e grossartegi Sach. Ds Ässe isch fein, uf em Platz isch Öppis los, – was wosch no meh.
Aber schön der Reihe nah.
Wo am halbi sibni der Wecker het ta, – het der Eduard no nid ganz wölle tue! Zweni g’schlafe u Chopfweh, – was git das für ne Tag? Ds Zmorgebüffet isch toll, – der Kafi zum Verzwifle. (Aber immerhin geit ds Chopfweh langsam verby.)
Am nüni fahrtr dr Bus vor, mit eme eltere, nigunagunöie Frömdefüehrer. Mir fahre zur Zitadälle vo Amman, em Sitz vo de Mächtige im G’schichtsverlouf. U G’schicht spielt o e Houptrolle bi däm B’suech.
Es zieht, isch bewölkt u d Sunne isch e Wunschtroum. Zum Glück cha me sech ja a lege. 😉 Vo de Palaschtruine g’seht me zum «g’wöhnleche Volch abe». Schreg unger isch e Ruine vo me römische Theater. Rund um g’seht me aber Hüser um Hüser. Amman het füf Millione Bewohner, vieli si Flüchtlinge. Ganzi Stadtteile si für se ‹boue worde. (Ganz Jordanie het öppe zwölf Millione Iwohner u öppe d Grössi vo Öschterriich.)
Später göh mer de zum Theater ache: gaaanz idrücklech!
Zum Zmittag chouft der Frömdefüehrer ‹Streetfood›. Ässe tüe mer äbe i dere Beiz, wo n i am Afang erwähnt ha. Ganz fein!
Nachhär loufe mer zu re grosse Moschee. Natürli g’hört o das zum Programm😊. Gägeüber isch e grossi kopteschi Kathedrahle, – Gott het vieli Näme. Der Füehrer wird o nid müed z betone, dass hie es friedlechs Näbenang vo de Glöibige g’läbt wärdi.
U zum Dessär göh mer de i ne ‹jordaneschi Konditorei oder Confiserie›. Es passt!
Natürli, das si Betribe, wo üs nid nume us Fründlechkeit empföh. Aber glych, – i trinke halt de es Kardamom-Kafi u choufe o chly Süesses.
Am halbi vieri si mer im Hotäl u chöi der Räschte vom Tag sälber g’stalte. Z dritt b’sueche mer e grossi Ichoufsmall, gägenüber vom Hotäl. (Ds Shoppy isch im Verglych es Lädeli.) Da stecki usländisches Gäld drinne, – me g’seht’s. D Läde si o samt international.
So am sibni bi n i wieder im Hotäl, – mache Büro u gah hüt früecher i ds Bett 😀.
