6. Dezember 2022 10:39
Unnamed Road, Jordanien | 21°C
Na ja, sooo guet schlaft me de o nid i dere Wüeschteburg. Ds Bett isch z weich, d Luft z troche, me g’hört all pot wieder Lüt braschte u churz nach de füfe föh si i der Wärchstatt näbena lärme.
Am achti gah n i zum Zmorge. I vermisse die umsichtegi Bedienig vo Akaba, aber ds Büffee isch o hie gross. Nachhär gah n ig gah ds Areal erkunde.
I beschliesse, im Tote Meer gah z bade.
Das Wasser het scho e enorme Uftrieb. Drii geit me besser rückwärts, wenn’s eim d Bei lüpft, dass me rückwärts i ds Wasser geit. Süsch het me ds Muu voll u das isch meh als gruusig!
Us em Wasser use, wärde d Füess u d Bei vo me A’gstellte mit Salz i g’ribe: special treatment.
Guet, ds Salzwasser isch i allem. I cha a me Finger süggele u ha n es Pommefrit im Muu. Guet dass me im Zimmer no e Duschi het.
Am Mittag gah n i de es Salätli gah ha, im Luigi’s. Isch guet. Dernah es Nickerli u em halbi füfi nime n i der Wäg zum Meer no einisch unger d Füess. Der Idruck vo däm Bad itz isch öppe der glych. Es idrücklechs Erläbnis, aber i würd itz no Bessersch kenne.
I tue mer es Orangesäftli g’nähmige u sinniere chley über dä hütig Tag. G’rad viel isch nid g’lüffe, aber was wott me. I de Ferie git es fuuli Tage u morn söll es de scho hei gah.
Am füfi trifft me sech wieder ir Beiz.
Später zum Znacht het es wieder e enormi Uswahl. Später luege n i sogar, wie d Marokkaner d Spanier töffle 😃. Das wird der längscht Fernsehkonsum vo dere WM blibe.
Am nüni bi n i im Zimmer u mache Büro.
