5. Dezember 2022 15:14

منطقة الفنادق, سويمة, الأردن | 18°C

I me Zimmer us «Tuusig u eire Nacht», irgendwie Burg, irgendwie Kitsch, irgendwie arabisch, irgendwie Disney. So chunnt mir mis Zimmer vor.

Mer hei wieder züglet. Vo Akaba am rote Meer si mer los,  itze am tote Meer tüe mer die fasch letschti Feriezyt verbringe. Dä Ort hie isch us der Retorte, het eigetli ke Name, aber luter Hotäl mit de tollschte Referänze. Übermorn geit es de scho wieder wyter nach Amman u uf e Flughafe.

Nach me guete, usgiebige Zmorge bi n i chley fuul g’sy. E Spaziergang em Meer nah, chley i der Hotälalag desumeg’schnöigget, fertig packt u de am elfi het me müesse uschecke. Es isch alles tippitoppi ‹gange. Em halbi zwölfi isch de der Bus cho. Der Fahrer isch geng no der glych, nume der Frömdefüehrer isch tuscht worde. Schad!

Währed em Fahre, oder besser rite, ha n i chley döset u zytewys g’schlafe. Fötele isch schwierig g’sy u usserdäm si d Fotomotiv langsam geng öppe die glyche. Dür das, dass d Strass mängisch rächt holperig isch g’sy, isch me geng öppe wieder g’weckt worde. Ds Fötele isch aber o nid eifacher worde.

Stundelang si mer ungerwäg’s, mer mache zwar e Halt (das isch aber o nume e Tourischtefalle), fahre gly wyter u trudle de so gäg die füfe hie i: Mövenpick Dead Sea, Dead Sea Road Sweimeh, Amman 11180, Jordanien

Vor em Znacht trifft me sech im Village Café zu me Tränkli. I chume fasch z spät dert a, will die Alag so extrem witlöifig isch.
Nach de sächse geit es de i ds Resturant, de wird no einisch g’schlemmt. nächscht Wuche steit das Büffee de nid ar Houptstrass 95. 😉

Am zähni bi n i wieder im Bett.