4. Dezember 2022 20:58
Unnamed Road, Jordanien | 20°C
Nautilus, das muess i mer merke. Mit dene wott i uf ds Meer.
Eigetli het es vorgeschter mit eme Internetbytrag a g’fange. Dert hei si vo Glasboot g’schribe, – Boot mit eme Glasbode für ds Meer z g’seh.
Touche cha n i nid u wott’s o nümm lehre. Schnorchle, das isch so ne Sach. We mer Zyt niem, würd is scho no lehre, -aber äbe. Auso isch das mit em Glasboot gar nid die dümmschti Idee. I frage mal bi der Hotällobby u die empfähle der huseiget Touchklub. Hüt morge göh mer de z zweit dert häre. Kes Problem, si reserviere bim Touchklub Nautilus.
Mer göh z Fuess dert häre u müesse zersch einisch warte. Nach ere halb Stund chöme die mit ihrem gälbe Boot vom Meer zrügg. Ibder Zwüschezyt het es Lüt ‹gäh wo hinger üs warte. I bi froh, hei mer reserviert. Richtig, wo n es de um ds Istige geit, hei die Hinderschte ke Platz meh. D Chefi isch sträng u git uf der ganze Fahrt der Song düre. 😄
Mer fahre uf ds Meer, aber gar nid wit use, u de cha me i Glasteil ache chlättere. Dert g’seht me die Ungerwasserwält im rote Meer. Es het e grossi Vielfalt a Tier u Pflanze z bestune.
Wieder einisch wird mer bewusst, wie d Fernsehwält üs verbildet het. Erschtens isch hie im Wasser unger vor allem blau u no einisch blau. Es het scho Farbe, aber die chieme mit viel Liecht füre. D Föteli si de o, vor allem blau +i müesst e Spezielli 📷 ha oder spezielli Filter. U de si die tolle Fische, ob Neon-, Silber-, Nadel-, Zebra-, oder Irgendwie 🐟 eifach schuderhaft chly – aber total schnäll. Bis ig de albe abdrückt ha, si si wäg u dert fählt de ds Liecht.
Aber, es het sech g’lohnt ( o we’s mängisch der Mage fasch chley g’lüpft het) mis Geburig’schänkli isch bim Eduard a cho.
Nach dere Fahrt g’nähmige mer is es Salätli. I loufe de zum Hotäl u lise no chley uf em Balkon.
Vor em Nachtässe trifft me sech zu me Getränk ir Halle. Nachdäm die ganzi Gruppe es «happy birthday» g’sängeret het, übernime n i dä Schade. Si überschlöh sech de fasch mit Pfötli drücke 🤣.
