18 & 19. November 2023 13:49

Konnichiwa! 🗾

🌍 Trip Übersicht:

🏨 Ungerkunft    (Hotel / AirBNB / Hostel)

👁️Erschte Idruck:
Japan cha chalt sii.

👜 G’machti Sache
E letschti Busfahrt in Japan u no einisch Shinkansen

👀 G’sehni Sache
Die alte Boute in Osaka si i-drücklech u o schön.

🍽️ G’gässni Sache
Riis mit Tomatesauce, überbache mit Ei u Chäs

🗓️ Der hütig Tag verzellt mit zäh Bildeli

Es geit zrügg! Mit em Bus Fahre mer vo Nagasaki wieder bis Fukuoka, wo der Shinkansen haltet. D Fahrt füehrt über Land un es geit g’müetlech, i ha es Fläschli Kafi bi mer. Wieder im Shinkansen geit es de rasant. Zwo Stung achzäh Minute später si mer ds Osaka. Mit em Bus fahre mer zersch dür d Stadt u lande de bi der Burg Osaka.  Das ehrwürdige Geböid um’wandere› mer, – es isch chalt.
Mit em Bus geit es de i Stadtteil Dotombori, das isch ds Vergnüegigsviertel vo der Stadt. Wahnsinn, all die Lokal u Läde wo da Platz hei. Es düecht eim, alli Bewohnerinne u Bewohner vo Japan sige da. Hie wei mer is no einisch mit japanische Köschtlechkeite verwöhne. I me erschte A-louf probiere mer als Gruppe gah z ässe, aber alles isch b’setzt u verusse, wo me n is abietet, isch soumässig chalt. Mer teile n is uf. Z zweit göh mer de i ne outomatisierti Beiz (b’stelle u so geit alles über ds Internet). I ha Riis, mit ere Tomatesauce u Ei drüber… g’schmacklech ist es sehr guet g’sy, – aluege cha me’s fasch nid.
Am früeche Abe träffe mer is wieder u fahre zum Flughafe Kansai, wo total uf re Insle isch.
Nach em übleche Prozedere flüge mer mit Emirates nach Dubai.

Vom halbi zwölfi i der Nacht in Osaka flüge mer de bis em Viertel vor sächsi am Morge na Dubai. Flugduur elf Stung füfzäh).  Alles verlouft guet u me het einigermasse Platz
Bis Züri si’s de no einisch siebe Stund z flüge. Na  re Rundi käfele in Dubai wärde o die unger d Flügu g’no. Die letschti Rundi vo Züri bis Rappi isch es Nasewasser. I chume im Louf vom Nami daheim a.