17. November 2023 23:18

5-6 Onouemachi, Nagasaki, 850-0058, Japan | 11°C

Konnichiwa! 🗾

🌍 Trip Übersicht:

🏨 Ungerkunft    (Hotel / AirBNB / Hostel)

👁️Erschte Idruck:
Es rägnet, o in Japan. Nagasaki isch grau u weni i ladend.

👜 G’machti Sache
Museumsinsle Dejima b’suecht. Im Hafe g’sii. Gah lädele im You-me.

👀 G’sehni Sache
E chlyne Iblick i ds Mittelalter. D Hushaltsabteilig vo me Warehus.

🍽️ G’gässni Sache
Mochi, i verschiedene Variante
🗓️ Der hütig Tag verzellt mit zäh Bildeli

Wow, ha ganz guet g’schlafe. Wo n ig de aber zum Fänschter us luege, isch grau u nass. Später tuet es uf, aber es isch ganz unbeständig. Mängisch cha n es richtig «schiffe», par Minute später schynt d Sunne. Das blibr der ganz Tag so.

I gah zum Zmorge u erprobe ds Büffee. Nid schlächt. Ds Hilton macht sim Name alli Ehr. Me cha sech international düre»frässe».

Nachhär ha n i Zyt, no einisch mi Kofferladig z überprüefe. Es isch mitlerwyle viel dräckig da drinne.

Am nünifüfzäh isch wieder Programm. Mit em Tram fahre mer zur Museumsinsle Dejima. Uf dere künschtleche Insle het ds Japan vo der Shogunzyt erschti Handelsbeziehige, zersch mit Portugal, de mit de Niederländer g’chnüpft. D Hüser hie si alli originalgetröi reschtauriert u rekonstruiert worde. Zum Teil loufe Usstellige da drin u es het überall Schouspieler i alte Koschtüm.

Ja, o dä Ort wird rege b’suecht. Legione vo Schüelerinne u Schüeler i jedem Alter wärye hie häre g’füehrt

D Insle isch nid gross. Entsprächend isch der Platz vo de Europäer g,sy. Die hei denn nähmli nid uf ds Feschtland dörfe.

Anschliessend loufe mer zum hütige Hafe, wo o Betrieb isch. Schiff i verschiedenschte Grössine lige da.

Der Räschte vom Nami isch frei u d Gruppe verteilt sech.

Zum Zmittag gah n i dert i ne Beiz. Es git e Pilzgratin mit Gmües u n es Süppli.

Näbedranne isch ds «You me», es riesig’s Warehus. Drinne hei einzelni Händler ihrer Plätzli u biete die erschiedenschte Wate a. I finge wunderhüba hi Sache. (… wo natürli Gäld choschte. 😲)

Am füfi fahre mer uf Nagasakis Husbärg (oder so öppis). Mt. Inasayama Observatory heisst d Spitze. Es het Antenne u Observatorie. Dernäbe isch es e Freizytpark für d Familie vo Nagasaki; – chlyne Tierpark, Spielplätz, Konzärtirichtige und, und und.

Bis mir de am füfi zu der Seilbahn chöme, rägnet’s i Ströme. Mer chöme im Taxi u vor em Usstige lege n i no mi Rägejagge a. D Bahnfahrt isch nume churz u o dobe isch gruusig Wätter. Trotzdäm möcht i es Föteli mache; – u merke, i ha ds Händi nümm!

I säge’s em Reiseleiter. De chöme scho die erschte Zwifu: ha n is überhoupt us em Zimmer mitg’no, ha n is bim Kafitrinke i der Lobby vwrlore, oder uf em Wäg zum Taxi, oder irgendwo bi der Seilbahn.

Druf telefoniere nützt nid viel. I ha d SIM zum Telefoniere nid freig’schalte.

Wieder i der Stadt unde göh mer mal gah ässe. Das isch guet, aber i bi mit em Chopf em Plane, wie ig ohni Händi hei chume.

Zrügg im Hotäl stell i fescht, dass es nid im Zimmer isch, nid isch g’funhe worde …

Der Reiseleiter telefoniert d Taxiungernähme ab. I gah mal uf ds Zimmer u wott probiere,  om Compi us e Ortig z mache. De chunnt der Aruef i ds Zimmer: der Täxeler het ds Händi g’funde u bringt’s i ds Hotäl.

Ja, u so ha n ig itz mis Händi wieder.

E guete Abschluss vo der Japanreis. O we n i zwüschedüre g’schnödet ha, es si ganz ehrlechi Lüt!