14. November 2023 00:15
678-2 Ōmandokorochō, Shimogyo Ward, Kyoto, 600-8413, Japan | 8°C
Konnichiwa! 🗾
🌍 Trip Übersicht:
| Wenn: | 14.11.23 |
| Wo: | Japan |
| Tag: | 11 vo 16 |
| Veranstalter: | Tourasia |
🏨 Ungerkunft (Hotel / AirBNB / Hostel)
| Name: | Daiwa Roynet Hotel |
| Ort: | 678 Ōmandokorochō, Shimogyo Ward, Kyoto, 600-8413, Japan |
👁️Erschte Idruck:
Wenn älti Italiänerinne vor em Toaster stöh, de blibe si! Duss isch chalt aber schön. Der Räge macht e Pouse.
👜 G’machti Sache
Mal wieder chley Ornig i der Goffere. Viel g’hocket.
👀 G’sehni Sache
I stune, wie chlynrüümig d Wohnverhältnis in Kyoto si. D Gärteli, d Terässeli … I ha n es Zimmer, wie e halbi Wohnig.
Der Holztämpel het unändlechi Usmass. Ds Mihomuseeum isch boue wie der «Wäg uf Shangrilah». Der guldig Tämpel isch idrücklech, aber schlächt a g’leit.
🍽️ G’gässni Sache
I bi bim weschtleche Zmorge blibe. Zmittag es vegetarisches Sandwitch u am Abe e Salade niçoise
🗓️ Der hütig Tag verzellt mit zäh Bildeli
 |
 |
 |
 |
 |
 |
 |
 |
 |
 |
I bi am sächsi wach u de tüecht mi, es sig doch no chley früech. Useluege isch nume e begränzti Fröid. Tourasia het ällwä nid die tüürschte Zimmer buechet. Was i däm Turm isch, wo zäh Meter vor mim Fänschter steit, erschliesst sech mir nid. Är nimmt eifach e Teil vo der Ussicht. Aber was söll’s –
Hüt göh mer mit em Bus zum goldene Tämpel, i bi g’spannt. Das geschter sig der silberig g’sy, – de müesst ja hüt no e steigerig cho 😉.
Das grösste Holzgebäude der Welt? Das behoupte si wenigschtens über dä Tämpel da. Higashi Hongan-ji heisst er u isch i de achzähnünzger Jahr nöi ufb’boue worde. Der ursprünglech Tämpel isch ab’brönnt u de heig me ne genau glych u wieder us Holz boue. Ds Holz heig me im Winter mit Schlitte us de Bärge g’reicht. D Froue heige d Haar gah für drus Seili z mache um die Boumstämm chönne z transportiere… Nu de, e imposante Bou uf jede Fall.
Mit em Bus fahre mer de wyter zum Miho Museum.
Vereinfacht geit d G:schicht da dervo eso: e Frou us unändlech riichem Hus, wo Gäld absolut ke Rolle spilt, wott es Museeum für ihrer vier wärtvolle Teetasse lah boue. Der Architekt wott das aber nid. Drum chouft die Frou wältwyt, was uf em Märit u wärtvoll isch a Kunschtwärch zäme u der Architekt bout es grandioses Museeum. Drum het es itz hie Kunschtwärch wo absolut einmalig si. Drü Fotobispiel (siehe oben):
Stehender Buddha 2. Hälfte des 2. Jahrhunderts n Chr aus Pakistan
Sitzende weibliche Figur, Ende 3. Anf. 2. Jahrtausend v. Chr. Baktrien, Afghanistan
Nilpferd 21. bis 17. Jahrhundert vor Chr. Aegypten
Mer ässe de no hie u fahre im Louf vom Namittag wieder nach Kyotto zügg.
Uf em Rückwäg fahre mer no zum guldige Tämpel.
Ursprünglech isch das e Palascht vo me Shogun. Speter wird drus e Tämpel. Was me hüt g’seht, isch aber e Nachbildig, wil ds Original verbrönnt isch.
1950 zündet e Chloschterschüeler das Gebäude a. Idrücklech, aber total überloffe.
Am Abe göh d «Roubtier»gah Kobe-Fleisch ässe. I ha i me französische Beizli e Salat, mache de Büro, ruume uf u gah i ds Bett.
